मंसिर ३० पोखरा । नेपालका अङ्ग्रेजी भाषा शिक्षकहरुको पेशागत संगठन नेल्टा गण्डकी प्रदेशल शाखाको आयोजनामा पोखरामा दुई दिने कार्यशाला सम्पन्न भएको छ । कार्यशाला पोखराको ताल बाराही माध्यमिक विद्यालयमा शनिबार र आइतबार गरि दुई दिन सञ्चालन भएको थियो ।
कार्यशालामा गण्डकी प्रदेश भित्रका प्रत्येक जिल्लाबाट ३ जनाको दरले जम्मा ३० जनाको सहभागीता रहेको उक्त कार्यशालामा शैक्षिक अनुसन्धानमा रुचि राख्ने, अनुसन्धान विधिहरूको आधारभूत ज्ञान भएका, अंग्रेजी भाषामा दख्खलता भएका, अनुसन्धानमा सक्रिय सहभागीताको प्रतिबद्धता जनाएका, सहयोग र विचारको आदान प्रदान गर्न इच्छुक अङ्ग्रेजी शिक्षकहरुमध्येबाट नेल्टाको जिल्ला शाखाले सिफारिस गरेका शिक्षकहरुलाई कार्यशालामा सहभागी गराइएको थियो ।
नेपालकै अङ्ग्रेजी भाषा शिक्षणको क्षेत्रमा उत्कृष्ट मानिएको नेल्टा गण्डकीले प्रकाशित गर्दै आएको स्टार रेटेड जर्नल (Journal of NELTA Gandaki–JoNG) को प्रत्येक अङ्कमा गण्डकी प्रदेश भित्रकै अङ्ग्रेजी शिक्षकहरुद्वारा अनुसन्धान गरेर तयार पारिएका लेखहरुलाई समावेश गराउने उद्देश्यले यो कार्यशाला सञ्चालन गरिएको जानकारी नेल्टा गण्डकीका सभापति कमलराज लम्सालले दिए ।
सभापति लम्सालले कार्यक्रमको औचित्यमाथि प्रकाश पारेका थिए । कार्यक्रममा सह–प्राध्यापक डा. नवराज न्यौपाने र उप–प्राध्यापक डा. पिताम्बर पौडेलले कार्यशालामा सहजीकरण गरेका थिए ।
कार्यशालामा सहभागी अङ्ग्रेजी शिक्षकहरुमा अनुसन्धान सिपको ज्ञान दिलाउने, समालोचनात्मक सोचको विकास गराउने, अनुसन्धानात्मक लेखनमा सुधार ल्याउने, अनुसन्धानमा सहकार्यलाई प्रोत्साहन दिलाउने, पेशागत सिप विकासलाई टेवा पु¥याउने जस्ता उद्देश्य राखेर कार्यशाला सञ्चालन गरिएको जानकारी नेल्टा गण्डकीका कार्यसमिति सदस्य प्रकाश रिजालले जानकारी दिए ।
शैक्षिक अनुसन्धानका आधारभूत तत्वहरु अनुसन्धानको विषयवस्तुहरुको खोजी र चयन, लेखाई वातावरण र अनुसन्धान प्रश्नहरु, उपलब्ध साहित्यको समालोचनात्मक पुनरावलोकन गर्ने तरिका, अनुसन्धानका डिजाइन र विधिहरू लेखन, नतिजा÷निष्कर्ष र छलफल लेखन र निष्कर्ष र सार लेखन कार्यशालाका प्रमुख विषयवस्तुहरु थिए ।
कार्यशालाको समापन सत्रमा सहभागीहरुको तर्फबाट बोल्दै नेल्टा स्याङ्जाको अध्यक्ष ओम विकास सिंजाली र नेल्टा नवलपुर जिल्ला कार्यसमिति सदस्य रीता खड्काले उक्त कार्यशालाको प्रशंसा गर्दै कार्यशालाका व्यवहारिक विषयवस्तुहरुले सहभागीहरुको लेखन सीप विकास भएको, अनुसन्धानप्रति सहभागीहरुको रुचि र प्रतिबद्धता बढाएको, र सहभागीहरुविच सामुहिक कार्यको लागि सम्पर्क विस्तार गराएको कुरा बताउनु भएको थियो । साथै, उनीहरुले कार्यशालामा सिकेका सिपलाई आगामी दिनमा आफ्नो प्राज्ञिक लेखनमा प्रयोग गर्ने प्रतिबद्धता व्यक्त गरे ।
कार्यक्रमको समापन सत्रमै सहजकर्ताद्वयले सहभागीहरूले अनुसन्धानको नयाँ सीप र सोच अपनाएको अनुभव गरेको र शिक्षकहरुलाई थप अनुसन्धान गर्न र लेखन कार्यमा योगदान दिन प्रेरित गरेको प्रतिक्रिया दिए ।
समापन कार्यक्रममा नेल्टा गण्डकीका सभापति कमलराज लम्सालले कार्यशाला ज्ञानवर्धक, प्रभावकारी र उद्देश्यमुलक रहेको भन्दै सवै सहभागीहरुलाई प्रत्येक बर्ष कम्तिमा एउटा अनुसन्धानात्मक लेख नेल्टा गण्डकीद्वारा प्रकाशन हुने जर्नलमा पेश गर्न उत्प्रेरित गर्दै उक्त लेखहरु नेल्टा गण्डकीको जर्नल वा अन्य कुनै माध्यमबाट प्रकाशन गराउन प्रयत्न गर्ने प्रतिबद्धता व्यक्त गरे ।
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
माघ ९, पोखरा ।सशस्त्र प्रहरी बलले बुधबार २४ औं स्थापना दिवस मनाएको…
