सन्देश श्रेष्ठ
पोखरा, भदौ २४
मंगलबार साँझ कास्कीको किम्रुङखोला थुनियो भन्ने हल्ला फैलियो । स्थानियको हवाला दिदै उच्च बाढी सतर्कता प्रणालीले एक सूचना जारी गर्दै अन्नपूर्ण गाउँपालिका वडा नम्बर–११ स्थित किम्रुङखोला थुनिएको हल्ला फैलिएको हो । उच्च बाढी सतर्कता प्रणालीले नै किम्रुङखोला थुनिएको भन्दै सो खोलाको तल्लो तटीय क्षेत्रका बासिन्दालाई उच्च सतर्कता अप्नाउन आग्रहसहितको ‘हाईअलर्ट’ सूचना जारी ग¥यो । त्यसलाई जिल्ला प्रहरी कार्यालय कास्की, जिल्ला प्रशासन कार्यालय कास्की, जिल्ला प्रहरी कार्यालय पर्वत, जिल्ला प्रशासन कार्यालय पर्वतदेखि अन्नपूर्ण गाउँपालिकालगायतले सेयर गरे । त्यसपछि मासमा फैलिएको त्यो सूचना सामाजिक सञ्जालमा भाइरल बन्यो ।
स्थानियले खोलामा पानीको सतह घटेको देखेपछि दिएको जानकारीका आधारमा उच्च सतर्कताका लागि आग्रह गरिएको थियो । खोलामा ठूलै पहिरो गएको पूर्वानुमानका आधारमा ‘हाईअलर्ट’ जारी गरिएको हो । किम्रुङखोला नदी तटीय क्षेत्रहरु कास्कीको वीरेठाँटी, नयाँपुल तथा पर्वतको पातीचौर र डिमुवा क्षेत्रमा ‘माइकिङ’ गरेर स्थानीयलाई सुरक्षित रहन आग्रह गरिएको थियो भने स्थानीयले रातमा घर छाडेर सुरक्षित स्थानमा निस्किएका थिए ।
तर उच्च बाढी पूर्व सूचना प्रणालीले भनेजस्तो किम्रुङखोलाको पहिरो ठूलो नभएको पाइएको छ । कास्की प्रशासन, प्रहरी, नेपाल आर्मी, स्थानिय प्रहरी चौकीका प्रतिनिधि, गाउँपालिकाका जनप्रतिनिधिलगायतको टोलीको स्थलगत तथा बुधबार विहान नेपाल आर्मीको हेलिकोप्टरबाट गरिएको अवलोकनमा किम्रुङखोलामा सामान्य मात्रै पहिरो गएको पुष्टि भएको अन्नपूर्ण गाउँपालिकाका अध्यक्ष विष्णुबहादुर केसीले जानकारी दिए । झिनुभन्दा केहि माथि पहिरो गएर खोला थुनिएको रहेछ,उनले भने,‘अहिले थुनिएको खोला बग्न थालेको छ र किम्रुङखोला पुरानै वहावमा फर्किएको छ ।’ नेपाली सेनाको हेलिकोप्टरबाट हेर्दा झिनुभन्दा माथि पहिरो गएको देखिए पनि अहिले थुनिएको पहिरो बगेर खोला पुरानै वहावमा फर्किएको देखिएको पोखरास्थित पश्चिम पृतनापती कार्यालयका पृतनापती भोलानाथ थापाले जानकारी दिएको गाउँपालिका अध्यक्ष केसीले बताए । पृतनापती थापालाई उद्धृत गर्दै अध्यक्ष केसीले भने,‘अहिले पनि सामान्य पहिरो जाने क्रम जारी छ ।’ तर जोखिम भने नरहेको उनले बताए ।
अन्नपूर्ण गाउँपालिका–११ का कार्यवाहक वडाध्यक्ष जगन गुरुङले मध्यरातबाटै खोला सामान्य अवस्थामा फर्किएको बताए । आवश्यक्ताभन्दा बढी हल्ला भयो,उनले भने,‘खासमा खोलामा पानीको सतह घटेको सहि हो । तर त्यस्तो ठूलो जोखिम हुनेगरी पहिरो गएको होईन ।’ भोटेकोशीमा आएको बाढीले रसुवा, नुवाकोट, धादिङलगायतका जिल्लामा ठूलो क्षेती पु¥याएकाले त्रसित जनता किम्रुङखोलामा पानीको सतह सामान्य घट्दा पनि डराउँदा त्रास फैलिएको उनको भनाई छ । सायद भोटेकोशीले पु¥याएको क्षेतीले जनता त्रसित थिए,उनले भने,‘त्यसैको परिणाम स्वरुप किम्रुङखोलामा पानीको बहाव घट्ने वित्तिकै कास्कीदेखि पर्वतसम्मका मानिसमा हल्लैहल्लामा त्रास फैलियो ।’
गाउँपालिका अध्यक्ष केसी भने सतर्कता अप्नाउँदा त्रास फैलिएको मान्न नहुने बताउँछन् । यसअघिल्ला वर्षहरुमा पनि किम्रुङखोलामा पहिरो जाने गरेकाले जोखिमलाई मध्यनजर गरेर सतर्कताका लागि उच्च बाढी पूर्व सतर्कता प्रणालीदेखि प्रहरी, प्रशासन र गाउँपालिकाले सूचना जारी गरेको उनले बताए । अहिले पनि पहिरो खसिरहेको र खोलामा धमिलो पानी बगिरहेको सूचना छ,उनले भने,‘जोखिम न्यूनिकरणका लागि गरिएको प्रयास भएकाले यसलाई सकारात्मक रुपमा लिनुपर्छ ।’
कास्कीका सहायक प्रमुख जिल्ला अधिकारी चित्राङ्गद बरालले खेम्रुङबाट ५ घण्टा माथि पर्ने कुम्रुङडाँडामा पहिरो गएर खोला थुनिएको पाइएको बताए । यद्वपी जोखिम नरहेको भन्दै उनले भने,‘साँझबाट थुनिएको खोला त्यसको दुई घण्टापछिदेखि सामान्य खुल्दै राती २ बजे ह्वात्तै खुलेर विहान ४ बजेदेखि सामान्य अवस्थामा फर्किएको पाइयो ।’ उनले पनि हालसालैमात्र आएको भोटेकोशी बाढीका कारण तर्सिएकाले किम्रुङखोला थुनिदा त्रास फैलिएको बताए । ‘फेरी अर्को भोटेकोशी घटना घट्छ कि भन्ने त्रास त हुँदो रहेछ’–उनले भने । तर सतर्कता अप्नाउने कुरालाई अन्यथा लिन नहुने उनले तर्क गरे ।
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
सन्देश श्रेष्ठपोखरा, कात्तिक ५ नेपालीको महान चाँड बडादशैंको टिकाको दिन कास्कीमा ट्राफिक…
