पोखरा हङकङ बजारमा अचाक्ली भाडा वृद्धि गरेको व्यवसायीको गुनासो

सन्देश श्रेष्ठ
पोखरा, बैशाख १३

पोखराको पृथ्वीचोकस्थित हङकङ बजारका सटरहरुको भाडा अचाक्ली वृद्धि गरेको व्यवसायीहरुले गुनासो गरेका छन् । सो बजारका व्यवसायीहरुको साझा संस्था पोखरा हङकङ बजार व्यवस्थापन समितिले आईतबार पत्रकार सम्मेलन गरेर हालको भाडामा ५ देखि १२ गुणासम्म सटर भाडा बृद्धि हुनेगरी टेण्डर आह्वान हुँदा व्यवसायी व्यवसायबाटै पलायनको अवस्थामा पुगेको जानकारी गराएको हो ।

यो पोखरा हङकङ बजार पोखरा उपत्यका नगर विकास समितिको ३ रोपनीसहित कुल १० रोपनी जग्गामा सञ्चालित बजार हो । यो बजार सस्तो बजारका रुपमा परिचित छ । सटर भाडा सस्तो भएकाले उपभोक्ताले पनि सामान सस्तो पाउने गरेका छन् । भाडादर २०६९ सालमा स्थापित यो बजारमा ४ सय व्यवसायी रहेका छन् । पटकपटक ठेकेदार कम्पनी र व्यवसायीबीच विवाद हुँदै आएको यस बजारमा हाल ठेकेदार कम्पनीले चार गुणा बढी भाडा तिरेर ठेक्कामा लिएको बताइएको छ । पहिले सस्तोमा ठेक्कामा लाग्दै आएको यो बजारमा अहिले एक्कासी चार गुणा बढी रकममा ठेक्कामा गएपछि त्यसको मार व्यवसायीलाई पर्ने व्यवसायीको तर्क छ । केहि वर्ष अघिसम्म यो बजार वार्षिक ३ लाखमा भाडामा लाग्दै आएको थियो भने पछिल्लो पटक ११ लाख ७१ ह्जार १ सय ५ रुपैयाँ कायम थियो । तर यस वर्ष भने ५ वर्षका लागि १ करोड ६२ लाखमा टेण्डर पारेर सम्झौता भएपछि व्यवसायी भाडा बढ्ने त्रासमा रहेको समितिले जनाएको छ । बिचौलिया कम्पनीहरुले मिलेमतोमा टेण्डर पारेर बजार हडप्न लागेको समितिको आरोप छ ।

ठेकेदार कम्पनीले नै बढी भाडा तिरेर लिएकाले व्यवसायीलाई सटर भाडामा १० गुणासम्म सटर भाडा बढाउनेहुँदा आफूहरु बिस्थापनको जोखिममा परेको पोखरा हङकङ बजार व्यवस्थापन समितिका अध्यक्ष सुरेशकुमार श्रेष्ठले बताए । टेण्डरमार्फत बजार भाडामा पाउने कम्पनीले सटर भाडा बृद्धि गर्ने बताइसकेको र त्यसले व्यवसायीहरु त्रसित अवस्थामा रहेको उनले बताए । ‘अत्यधिक भाडा बृद्दिले साना व्यवसायी बिस्थापित हुने जोखिम बढेको छ’–उनले भने । विश्वव्यापी महामारीका रुपमा फैलिएको नोभल कोरोना भाइरस (कोभिड–१९) र त्यसपछिको आर्थिक मन्दीका कारण संकटमा परेका व्यवसायी अहिले भएको भाडा बृद्धिले थला परेको उनले बताए । उनका अनुसार बढेको भाडा बृद्धि लागु भए ३० देखि ४० प्रतिशत व्यवसायी बिस्थापित हुनेछन् ।

बजार व्यवस्थापन समितिले भाडा दर पुनरावलोकन गर्न माग गरेको छ । समितिका अध्यक्ष श्रेष्ठले भाडादर वैज्ञानिक मापदण्डका आधारमा निर्धारण गर्न माग गरे । साना व्यवसायीलाई संरक्षण गर्ने नीति ल्याएर भाडादर निर्धारण गर्नुपर्ने उनको भनाई छ । बिचौलिया हाबी हुँदा व्यवसायी बिस्थापनको जोखिममा परेको भन्दै बरु सरकारले नै व्यवस्थापन गरिदिए व्यवसायी बाँच्ने उनको भनाई छ । बरु पोखरा उपत्यका नगर विकास समिति वा पोखरा महानगरपालिका आफैले चलाओस्,उनले भने,‘यसो गरेमा बिचौलियाले कमाउने पैसा सरकारको नाममा जान्छ । रोजगारी पनि सिर्जना हुन्छ ।’ उनले आफूहरु सिधै सरकारलाई भाडा बुझाउन तयार रहेको बताए । हामी सरकारलाई सिधै भाडा बुझाउन तयार छौं,उनले थपे,‘तर बिचौलियाको बिगबिगी अन्त्य गरोस् सरकारले ।’

व्यवसायीहरुले आफूहरुको माग पूरा नभए आन्दोलन गर्ने पनि चेतावनी दिएका छन् । समितिका सचिव दीनेश आचार्यले आफूहरुको माग पूरा नभएको आन्दोलन गर्नुको विकल्प नभएको बताए । भने,‘व्यवसायी बचाउने सरकारको काम हो । शान्तिपूर्ण रुपमा माग गर्दा पनि जबरजस्ती भाडा बृद्धि गरे बाध्य भएर आन्दोलनमा होमिनुपर्ने हुन्छ ।’

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।