खेलाडीको शिक्षा शुल्क तिरिदिने बाचा पूरा गरे राखेप सदस्य गुरुङले

विद्यालय स्तरिय खेलाडी विवेक सुनारको शिक्षा शुल्क तिरिदिने घोषणा गरेका राष्ट्रिय खेलकुद परिषद (राखेप) सदस्य राजेशकुमार गुरुङले शुक्रबार रकम हस्तान्तरण गरेका छन् । शान्ता माविका भलिबल खेलाडी विवेक सुनारको ३ वर्षका लागि शिक्षा शु्ल्क तिरिदिने घोषणा गरेका गुरुङले शुक्रबार उनलाई रकम हस्तान्तरण गरेका हुन् ।

कास्की जिल्ला भलिबल संघ र सृजना विकास केन्द्रको संयुक्त आयोजनामा पोखरामा भइरहेको तेश्रो सृजना कप सामुदायीक मावि छात्र÷छात्रा भलिवल प्रतियोगिताको समापन कार्यक्रममा राखेप सदस्य गुरुङले विद्यार्थीसमेत रहेका खेलाडी विवेक र उनकी आमालाई ३ वर्षका लागि लाग्ने शैक्षिक शुल्क वापतको ३६ हजार हस्तान्तरण गरेका हुन् ।

सुनार शान्ता मावि भकुण्डेमा कक्षा ११ मा अध्ययनरत छन् । सामुदायिक विद्यालय भएकाले मासिक ५ सय रुपैयाँ मात्रै शुल्क लाग्ने बताइएको छ । त्यसका अलावा भर्ना शुल्कलगायत गरेर ३ वर्षको कुल ३६ हजार लाग्ने भएकाले सो बराबरको रकम हस्तान्तरण गरेको कास्की जिल्ला भलिबल संघका अध्यक्ष भीम पराजुलीले जानकारी दिए ।

कास्की जिल्ला भलिबल संघले पनि भलिबलका कुशल खेलाडीको पहिचान गरि उनीहरुको अध्ययन खर्च बेहोर्ने नीति लिदै आएको छ ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।