सराङ्कोटमा गुरुयोजनाले सार्थकता पाउँदै, शनिबार गणेश मन्दिरको शिलान्यास

सूर्योदयसहित हिमश्रृंखला दृश्यावलोकनका लागि प्रख्यात पोखराको पर्यटकीय गन्तव्य स्थल सराङ्कोटमा गणेश मन्दिर निर्माण शुरु भएको छ । सराङ्कोटमा निर्माण गर्न लागिएको गुरुयोजना अन्तर्गतको गणेश मन्दिरको शनिबार गण्डकी प्रदेशका अर्थमन्त्री रामजीप्रसाद बरालले शिलान्यास गरेका हुन् ।

पोखरा महानगरपालिका वडा नम्बर–१८ सराङ्कोटको टुप्पोमा सराङ्कोट धार्मिक एवम् पर्यटन क्षेत्र विकास समितिले निर्माण गर्न लागेको शिव मन्दिरको आडमा गणेश मन्दिर निर्माण गर्न लागिएको समितिका अध्यक्ष प्रेमबहादुर जिसीले जानकारी दिए । उनका अनुसार त्यहाँ ३ तले गणेश मन्दिर निर्माण गरिनेछ । यो मन्दिर गुरु योजना अन्तर्गत निर्माण गर्न लागिएको सबैभन्दा महत्वपूर्ण मन्दिर हो ।

सराङ्कोट धार्मिक एवम् पर्यटन क्षेत्र विकास समितिले ४० करोड भन्दा बढीको लागतमा धार्मिक तथा पर्यटकीय क्षेत्र पूर्वाधार निर्माण गरिरहेको छ । ५६ रोपनी क्षेत्रफलमा फैलिएको सो क्षेत्रमा गुरुयोजना अन्तर्गत शिव मन्दिर, गणेश मन्दिर, भ्यू टावर, सभाहललगायतका पूर्वाधार निर्माण भइरहेको छ । जस अन्तर्गत शिव मन्दिरका लागि मात्रै करीब १६ करोड खर्च भइसकेको छ । अब त्यहाँ मूर्ती प्रतिस्थापन गर्न मात्र बाँकी रहेको समितिका प्रचारप्रसार संयोजक कृष्ण थापाले जानकारी दिए ।

त्यस्तै १ करोड २५ लाखको लागतमा भ्यू टावर निर्माण गरिएको छ । जसको फिनिसिङ गर्न बाँकी छ । मन्दिरको तल्लो क्षेत्रमा सभाहल भवन बनाइएको छ । जहाँ ३ वटा सभाहलसहित १२ वटा कोठाहरु रहेका छन् । २ तले यो भवनमा संग्रहालय, पूजा सामग्रीका सामान राख्ने कोठा र पूजारी तथा अतिथि कक्ष बनाइएको छ ।

करीब ४० करोडको लागतमा निर्माण गर्न लागिएको सो क्षेत्रमा हाल २० करोड खर्च भइसकेको समितिले जनाएको छ । अझै थप २० करोड आवश्यक परेपनि समितिसँग ८÷९ करोड भएपनि ११÷१२ करोड अपुग रहेको समितिका अध्यक्ष प्रेमबहादुर जिसीले बताए । ‘काम आँटेका छौं, तर बजेट छैन । संघ, प्रदेश र स्थानिय तहको सहयोगको अपेक्षा गरिएको छ’–उनले भने । त्यसका अलावा सहयोगी मनका धनीहरुबाट पनि सहयोगको अपेक्षा गरिएको उनले बताए । यसअघी महायज्ञबाट संकलित रकम र संघ, प्रदेश र स्थानिय तहबाट आएको रकमले अहिलेसम्म काम गरिएको उनले जानकारी दिए ।

शिव मन्दिर भन्दा तीन सय मिटर उत्तर पश्चिममा बौद्ध गुम्बा निर्माण गर्ने योजना बनाइएको थियो । सराङ्कोट धार्मिक एवम् पर्यटन क्षेत्र विकास समिति मातहत रहेको १५ रोपनी जमिनमा निर्माण गर्ने भनिएको सो गुम्बाको योजना अहिले अलपत्र परेको छ । बुद्ध धर्मावलम्वी मुस्ताङका आरडी विष्टले बौद्ध गुम्बा निर्माण गर्न १६ करोड दिएपनि एमाले बाधक बनेपछि सो योजना अलपत्र परेको स्थानिय बताउँछन् । स्थानिय एमाले कार्यकर्ताले बौद्ध गुम्बा निर्माण गर्न नदिने भनेर अडान लिएपछि सो योजना अगाडि नबढेको बताइन्छ । तर यसबारे स्थानिय कोहिपनि खुलेर विरोधमा उत्रिएका छेनन् । श्रोतका अनुसार सराङ्कोट केवलकार प्रालिले आँखा गाढेपछि त्यहाँ बौद्ध गुम्बा निर्माणमा एमालेजन अनिच्छुक देखिएका हुन् ।

गुरुयोजना सफल भएमा दश गुणा पर्यटक बढ्ने अपेक्षा गरिएको सराङ्कोट धार्मिक एवम् पर्यटन क्षेत्र विकास समितिको अपेक्षा छ । समितिका अध्यक्ष प्रेमबहादुर जिसीले भने,‘हाल दैनिक १५÷१६ सय पर्यटक आउँछन्, यो योजना सफल भएपछि दैनिक ८÷१० हजार पर्यटक आउने अपेक्षा गरेका छौं ।’ घुम्ने तथा धर्मकर्म गर्ने धार्मिक तथा पर्यटनसँग सम्बन्धित पर्यटक आउने अपेक्षा रहेको उनको भनाई छ ।

पोखरा १८ का वडाध्यक्ष रणबहादुर थापाले पर्यटकीय क्षेत्र सराङ्कोटलाई प्रमुख गन्तव्यको रुपमा विकास गर्न गुरुयोजना कोशेढुंगा सावित हुने विश्वास व्यक्त गरे । उनले गुरुयोजना सफल बनाउन वडाको तर्फबाट सक्दो सहयोग रहेको बताए ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।