साफ च्याम्पियनसीपः नेपालले आज भारतसँग खेल्दै

- च्याम्पियनसीप अन्तरगत आजकै अर्को खेल बेलुकी पौनृ ५ बजे माल्दिभ्स र श्रीलंकाले खेल्दैछन्


     एभरेस्ट आवाज    
     असाेज २४ गते २०७८ मा प्रकाशित



तस्बीरः एन्फा

साफ च्याम्पियनसीप फुटबलमा आज (आइतबार) नेपाल र भारत खेल्दैछ।

खेल नेपाली समयअनुसार राति पौने १० बजे माल्दिभ्समा सुरु हुनेछ।

यसअघिका २ खेल जितेको नेपाल ६ अंकसहित तालिकाको शीर्ष स्थानमा छ।

नेपालले पहिलो खेलमा माल्दिभ्सलाई १–० ले र दोस्रो खेलमा श्रीलंकालाई ३–२ ले हराइसकेको छ। लगातारको २ जितले नेपाल फाइनल नजिक छ। २ खेलमा बराबरी खेलेको भारत २ अंकसहित चौथो स्थानमा छ।

भारतलाई फाइनल पुग्न अबका बाँकी २ खेल जित्नै पर्ने दबाब छ। भारतले पहिलो खेलमा बंगलादेशसँग १÷१ गोलको बराबरी र दोस्रो खेलमा श्रीलंकासँग गोलरहित बराबरी खेलेको थियो।

नेपाली राष्ट्रिय टिमका मुख्य प्रशिक्षक अब्दुल्लाह अलमुताइरीले नेपाली राष्ट्रिय फुटबल टोलीले भारतीय टोलीसँग नडराइ खेल्ने बताएका छन्। उनले नेपाल भारतसँग जित्नकै लागि खेल्ने समेत बताएका छन्।

भारत साफमा ७ पटकको विजेता हो। नेपाल र भारत अहिलेसम्म २१ खेल खेलेकोमा भारतले १४ खेल जितेको छ। नेपालले २ खेल जित्दा ५ खेल बराबरीमा सकिएका छन्।

यसअघि, घरेलु मैदान दशरथ रंगशालामा भएका २ मैत्रीपूर्ण खेलमध्ये नेपालले पहिलो खेलमा बराबरी खेलेको थियो भने दोस्रो खेलमा भारत २–१ विजयी बनेको थियो। त्यस्तै, कप्तान किरण चेम्जोङले साफ च्याम्पियनसीप जित्ने बताएका छन् । आफ्नो, टोलीको र नेपाली फुटबलप्रेमीको सपना पूरा गर्न भारतसँगको खेल महत्वपूर्ण रहेको चेम्जोङले बताएका छन्।

भारतीय टोलीका मुख्य प्रशिक्षक इगोर स्टिमासले पनि नेपालसँग जित्नकै लागि खेल्ने बताएका छन्। उनले नेपाली टोलीले उत्कृष्ट खेलिरहेको पनि बताएका छन्। दक्षिण एसियाका ५ टोली साफ च्याम्पियनसीपमा सहभागी छन्।

३ खेल खेलेको बंगलादेश ४ अंकका साथ दोस्रो र २ खेल खेलेको माल्दिभ्स ३ अंकका साथ तेस्रो स्थानमा छ। एक अंक रहेको श्रीलंका पुछारमा छ। नेपाल र भारतको खेलअघि आज बेलुका पौने ५ बजे माल्दिभ्स र श्रीलंका पनि खेल्दैछन्।


सर्बाधिकार सुरक्षित गरिएको बारे ः यस एभरेष्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।