विकास निर्माणमा स्थानिय नागरिकहरुको सहयोग अपरिहार्य : मन्त्री थापा


     एभरेस्ट आवाज    
     असाेज २५ गते २०७८ मा प्रकाशित



पोखरा । गण्डकी प्रदेश सरकारका कानून, संचार तथा प्रदेश सभा मामिला मन्त्री विन्दुकुमार थापाले विकास निर्माणमा स्थानिय नागरिकहरुको सहयोग अपरिहार्य रहेको बताएका छन् ।

नेपाली काँग्रेस पोखरा महानगरपालिका वडा नं २१ ले आयोजना गरेको बडादशैं, तिहार, छठ तथा नेपाल सम्वत्को अवसरमा आयोजित शुभकामना आदानप्रदान कार्यक्रममा बोल्दै मन्त्री थापाले स्थानीय जनसहभागिता विना कुनै पनि विकास कार्यले गति नलिने बताए ।

उनले भने, ‘वडाको विकासमा स्थानीयको भूमिका उल्लेखनिय हुन्छ । त्यसैले स्थानीय जनसहभागिता विना कुनै पनि काम अगाडि बढाउन सकिदैन । विकासका सकरात्मक पक्षहरुमा सबै एक भएर हिड्नुपर्ने आजको आवश्यकता हो ।’

मन्त्री थापाले पोखरा २१ लाई पर्यटन क्षेत्रको रुपमा समेत विकास गर्दै लैजानुपर्नेमा जोड दिऐ । सम्भावना बोकेको क्षेत्र हुँदाहुँदै पनि विकासको दृष्टिकोणबाट अरु वडा भन्दा अलिक पछाडि परेको उल्लेख गर्दै होमस्टे अवधारणा अनुरुप वडाको आर्थिक स्तरमा सुधार ल्याउन सकिने उनले भने ।

उनले पोखरा २१ लाई कृषिको पकेट क्षेत्रको रुपमा समेत विकास गर्न सकिने बताउनुभयो । ‘पोखरा २१ लाई कृषिको पकेट क्षेत्रको रुपमा समेत विकास गर्न सकिन्छ’, उनले भने, ‘यहाँ धेरै सम्भावनाहरु छन्, हामीले पहिचान गर्न नसकेका मात्र हौं ।’

मन्त्री थापाले पोखरा २१ को विकास निर्माणमा देखिएका समस्यालाई सम्बोधन गर्न आफ्नो पहलकदमी रहने बताए । ‘सो क्षेत्रमा देखिएको खानेपानीको समस्यालाई समेत चाँडै नै समाधान गरिनेछ’, उनले भने ।

नेपाली काँग्रेस पोखरा २१ का सभापति केवल गिरीको अध्यक्षतामा सम्पन्न भएको कार्यक्रममा ४१ जना काँग्रेस प्रवेश गरेका छन् ।


सर्बाधिकार सुरक्षित गरिएको बारे ः यस एभरेष्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।