ओली पक्राउबिरुद्द एमाले कास्कीले बुझायो विरोध पत्र, भदौ २४ का दोषीको पनि खोजी

सन्देश श्रेष्ठ
पोखरा, चैत १५

पूर्व प्रधानमन्त्री तथा नेकपा एमालेका अध्यक्ष केपी शर्मा ओली जोगाउन आयोजित आन्दोलनमा भदौ २४ गतेको दोषीको खोजी भएको छ । नेकपा एमाले कास्कीको आयोजनामा पार्टी अध्यक्ष ओलीको पक्राउबिरुद्द आईतबार पोखरामा आयोजित विरोध कार्यक्रममा जेनजी आन्दोलनका क्रममा भदौ २४ गते भएको आगजनी तथा तोडफोडमा संलग्नहरुको खोजी भएको हो । सहभागीहरुले भदौ २३ गतेको दोषी करार गरेर तत्कालीन प्रधानमन्त्री ओली र तत्कालीन गृहमन्त्री रमेश लेखकलाई पक्राउ गरिरहँदा भदौ २४ गतेको तोडफोड र आगजनीमा संलग्नहरुलाई उन्मुक्ति दिन खोजिएको आरोप लगाए । उनीहरुलाई तत्काल पक्राउ गरि कारवाही गर्न उनीहरुको माग छ ।

ओलीको रिहाईको माग गर्दै आयोजित आन्दोलनमा सहभागी एमाले कार्यकर्ताहरुले राज्य आतंक बन्द गर, केपी ओलीलाई रिहा गर । संसद भवन जलाउनेलाई कारवाही गर, सुरक्षा निकायका भवनहरु जलाउनेलाई कारवाही गर, सरकारी भवन जलाउनेलाई कारवाही गरलगायतका नाराहरु लगाए ।

कार्यक्रममा बोल्ने वक्ताहरुले पनि ओलीको रिहाईसँगै भदौ २४ का दोषीमाथि कारवाही गर्न माग गरे । कार्यक्रममा बोल्दै नेकपा एमालेका केन्द्रीय सदस्य तथा कास्की सह–ईञ्चार्ज राजिव पहारीले जेनजी आन्दोलन जाँचबुझ आयोगले एकतर्फी रुपमा प्रतिशोधपूर्ण तरिकाले प्रतिवेदन बनाएको आरोप लगाए । पुराना दलका नेतालाई फसाउनका लागि नियोजित रुपमा प्रतिवेदन बनाइएको बताउँदै उनले भने,‘भदौ २३ गतेको दोषीको रुपमा हाम्रा अध्यक्ष ओली र तत्कालीन गृहमन्त्री रमेश लेखकलाई देखाइएको छ, त्यहि आधारमा पक्राउ गरिएको छ, तर भदौ २४ गते भएको सिंहदरबार, संसद भवनदेखि सरकारी कार्यालय र प्रहरी, प्रशासन कार्यालय जलाउनेलाईचाहिं खोई पक्रिएको ? खै कारवाही गरिएको ? ।’ उनले बन्द कोठरीमा बनाइएको प्रतिवेदन मान्य नहुने बताउँदै ओलीमाथि लगाइएको आरोप र धरपकड खारेज गर्न माग गरे ।

एमाले नेता तथा पूर्व सांसद दामोदर पौडेल बैरागीले बालेन सरकारलाई कठपुतली सरकारको संज्ञा दिए । भदौ २४ को तोडफोड र आगजनी गर्नेलाई सरकारले छुट दिएको भन्दै उनले आपत्ती जनाए । यो कसले बनाएको कठपुतली सरकार हो खुल्दै जाला,उनले भने,‘असंवैधानिक सरकारले जाँचबुझ आयोग बनायो, अवैध आयोगले प्रतिवेदन बनायो र त्यहि अवैध प्रतिवेदन अवैध सरकारलाई नै बुझायो र त्यहि आधारमा केपी ओली, रमेश लेखकलगायतबिरुद्द धरपकड शुरु भएको छ, यो गलत हो ।’ उनले सरकारले गरेको धरपडकबिरुद्द सडक र सदनमा आन्दोलनसँगै न्यायिक प्रक्रियामा जाने बताए ।

एमाले कास्कीका अध्यक्ष बैनबहादुर अधिकारी क्षेत्रीले ओलीलाई अमानवीय र असंवैधानिक तरिकाले गिरफ्तार गरिएको आरोप लगाए । उनले भदौ २४ बारे मौन बसेर २३ मा मात्रै केन्द्रीत भई प्रतिवेदन आउनुले सरकार र आयोगको नियत स्पष्ट भएको टिप्पणी गरे । आयोग गठन गर्नुअघि नै आयोगका संयोजकले व्यक्त गरेका अभिव्यक्तिले उनी स्वतन्त्र व्यक्ति होईन भन्ने पुष्टि भइसकेकाले सो आयोगले तयार गरेको प्रतिवेदन मान्य नहुने उनको भनाई थियो ।

यसैबीच विरोध पत्र बुझ्दै कास्कीकी प्रमुख जिल्ला अधिकारी रुद्रादेवी शर्माले एमालेलाई शान्तिपूर्ण आन्दोलन गर्न आग्रह गरिन् । कास्कीमा शान्ति सुव्यवस्था कायम गर्न चुस्त सुरक्षा व्यवस्था गरिएकाले त्यसलाई नबिथोल्न उनको आग्रह थियो ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।