पोखरामा आयोजित मौलिक देउसी–भैलो प्रतियोगितामा पुन समाज पोखरा च्याम्पियन बनेको छ।
तिहारको अवसरमा पोखरा–६, लेकसाइडस्थित गौरीघाटमा सोमबार आयोजित ‘मौलिक देउसी–भैलो उत्सव तथा प्रतियोगिता–२०८३’ मा सहभागी ११ समूहलाई पछि पार्दै पुन समाज च्याम्पियन बनेको हो । प्रतियोगितामा उत्कृष्ट प्रदर्शन गरेको पुन समाज पोखराले नगद २५ हजार रुपैयाँसहित ट्रफी र प्रमाणपत्र प्राप्त गरेको छ। नेपाली मौलिक लोकसंस्कृति तथा परम्परागत देउसी–भैलोको संरक्षण गर्दै नयाँ पुस्तामा हस्तान्तरण गर्ने उद्देश्यले प्रतियोगिता आयोजना गरिएको हो। पोखरा पर्यटन परिषद्, पोखरा महानगरपालिकाको आर्थिक विकास महाशाखा तथा पर्यटन प्रवद्र्धन शाखा र पब्लिक फोके टेलिभिजनको संयुक्त आयोजनामा भएको उत्सवको उद्घाटन पोखरा महानगरपालिकाकी उपप्रमुख मञ्जुदेवी गुरुङले दीप प्रज्वलन तथा गाई पूजा गरेर गरेकी थिइन्।
गाईपूजाकै दिन कार्यक्रम आयोजना भएकाले उत्सवस्थलमा सामूहिक गाईपूजासमेत गरिएको थियो। कार्यक्रममा बोल्दै उपप्रमुख गुरुङले नेपाली मौलिक कला, संस्कृति र परम्परा पछिल्लो समय ओझेलमा पर्दै गएको भन्दै यसको संरक्षणका लागि सामूहिक प्रयास आवश्यक रहेको बताइन्। नयाँ पुस्तालाई आफ्नो मौलिक संस्कृति र परम्परासँग जोड्न यस्ता उत्सव प्रभावकारी हुने उनको भनाइ थियो। पोखरा पर्यटन परिषद्का अध्यक्ष हरि भुजेलले मौलिक देउसी–भैलोको संरक्षणसँगै पोखराको सांस्कृतिक पर्यटन प्रवद्र्धन गर्ने उद्देश्यले उत्सव आयोजना गरिएको बताए। नेपाल पर्यटन बोर्डका कार्यकारी सदस्य सन्तोष पोखरेलले नेपाली चाडपर्व र सांस्कृतिक परम्परालाई अन्तर्राष्ट्रियस्तरमा चिनाउन सके पर्यटन प्रवद्र्धनमा थप सहयोग पुग्ने बताए।
प्रतियोगितामा सहभागी ११ वटै समूहले परम्परागत भेषभूषामा सजिएर नेपाली मौलिक भाका, शब्द, लय र तालमा देउसी–भैलो प्रस्तुत गरेका थिए। समूहहरूको मूल्यांकन मौलिकता, परम्परागत भाका, शब्द, लय, ताल, भेषभूषा र सांस्कृतिक प्रस्तुतिका आधारमा गरिएको थियो।प्रतियोगितामा सहभागी सबै समूहलाई नेपाली परम्पराअनुसार दानदक्षिणासहित बिदाइ गरिएको थियो। उनीहरूलाई चामल, फलफूल, सेलरोटी, नगद ५ हजार ५ सय ५५ रुपैयाँ र प्रमाणपत्र प्रदान गरिएको आयोजकले जनाएको छ।पोखरा पर्यटन परिषद्का महासचिव मिलन तिवारीले उत्सवमा स्थानीय समूहसँगै स्वदेशी तथा विदेशी पर्यटकको समेत उल्लेख्य सहभागिता रहेको बताए। नेपाली मौलिक देउसी–भैलो विदेशी पर्यटकका लागि नयाँ र रोचक अनुभव बनेको उनको भनाइ थियो।
पोखरा महानगरपालिकाको आर्थिक विकास महाशाखा प्रमुख मनहर कडरियाले मौलिक संस्कृति संरक्षण र पर्यटन प्रवद्र्धनलाई एकसाथ जोड्ने उद्देश्यले कार्यक्रम आयोजना गरिएको बताए। पोखरालाई प्राकृतिक सुन्दरतासँगै सांस्कृतिक पर्यटनको गन्तव्यका रूपमा विकास गर्न यस्ता कार्यक्रमले सहयोग पु¥याउने उनको भनाइ थियो। प्रतियोगिताको मुख्य निर्णायक पोखरा प्रज्ञा प्रतिष्ठानका प्रथम कुलपति पद्मराज ढकाल रहेका थिए। देउसी–भैलो प्रस्तुतिसँगै स्थानीय कलाकारका सांगीतिक कार्यक्रम तथा तिहारसँग सम्बन्धित सांस्कृतिक गतिविधिले गौरीघाट क्षेत्र उत्सवमय बनेको थियो।पब्लिक फोके टेलिभिजनका प्रबन्ध निर्देशक मन क्षेत्रीले पहिलोपटक आयोजना गरिएको उत्सव सबैको साथ र सहयोगले सफल भएको भन्दै सहभागी, सहयोगी तथा उपस्थित सबैप्रति आभार व्यक्त गरे।
कार्यक्रममा नेपाल पर्यटन बोर्ड, गण्डकी प्रज्ञा प्रतिष्ठान र पोखरा प्रज्ञा प्रतिष्ठान प्रर्वद्धक रहेका थिए भने कार्यक्रममा पर्यटनका विभिन्न संघसस्था सहित सामाजिक विकास युवा तथा खेलकूद मन्त्रालय, गण्डकी, सामाजिक विकास महाशाखा, पोखरा महानगरपालिका, माछापुच्छे्र, अन्नपूर्ण, मादी र रुपा गाउँपालिकालगायतको सहकार्य रहेको थियो ।
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
पोखरामा आयोजित मौलिक देउसी–भैलो प्रतियोगितामा पुन समाज पोखरा च्याम्पियन बनेको छ। तिहारको…
