विदेश पठाई दिन्छु भन्दै ९० लाख ठग्ने पक्राउ

ठगी गरेको आरोपमा पक्राउ परेका विश्वकर्मा

विदेश पठाई दिन्छु भन्दै झण्डै एक करोड ठग्ने पोखराबाट पक्राउ परेका छन् । वैदेशिक रोजगारीका लागि युरोप, क्यानडा, अमेरीकालगायतका विकशित देश पठाईदिन्छु भन्दै ठगी गर्ने पर्वत मोदी गाउँपालिका वडा नम्बर ७ स्थायी घर भई पोखरा महानगरपालिका वडा नम्बर ३० सिसुवा बस्ने ३८ वर्षिय धिरजकुमार विश्वकर्मा पक्राउ परेका हुन् । उनलाई पोखरा महानगरपालिका वडा नम्बर १० रामबजारबाट पक्राउ गरिएको कास्की प्रहरीले जनाएको छ । विश्वकर्माले आफू लामो समयदेखि विदेश बसेर फर्केको भन्दै मान्छेको मन जित्ने र ठगी गर्ने गरेको प्रमाणका आधारमा उनलाई पक्राउ गरिएको प्रहरीको भनाई छ ।

विश्वकर्माले ३३ जनाबाट ९० लाख ७१ हजार ५ सय लिएको पाइएको कास्कीका प्रहरी प्रवक्ता प्रहरी नायव उपरिक्षक (डिएसपी) सुवास हमालले जानकारी दिए । उनका अनुसार विश्वकर्माले पैसा असुल गरेकाहरुलाई विश्वासमा पार्नका लागि विभिन्न सहकारी र वैंकको चेकसमेत दिएको पाइएको छ ।

पक्राउ परेका विश्वकर्मालाई ठगी सम्बन्धी कसूर अन्तर्गत मुद्धा दर्ता गरि अनुसन्धान प्रक्रिया अगाडि बढाइएको डिएसपी हमालले जानकारी दिए ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।