पाँच दलीय गठबन्धनले भन्यो : राष्ट्रिय सभा सदस्यको चुनावमा प्रतिगमनलाई गण्डकीमा टाउको उठाउन दिदैनौं

राष्ट्रिय सभा सदस्यको निर्वाचनमा गण्डकी प्रदेशमा पाँच दलीय गठबन्धनको जित सुनिश्चित भएको दाबी गरिएको छ । पाँच दलीय गठबन्धनले आइतबार पोखरामा पत्रकार सम्मेलन गरेर आगामी माघ १२ गते हुने राष्ट्रिय सभा सदस्यको निर्वाचनमा गण्डकी प्रदेशका उम्मेद्वारहरुको जित सुनिश्चित रहेको दाबी गरेको हो । संसद विघटन गर्ने केपी ओलीको कदमलाई प्रतिगमन भन्दै पाँच दलीय गठबन्धन बनाएर लडेका उनीहरुले राष्ट्रिय सभा सदस्यको निर्वाचनपनि गठबन्धनबाटै लड्दैछन् । गठबन्धनमा सत्तारुढ दलहरु नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र सरकारलाई समर्थन गरेको राष्ट्रिय जनमोर्चा रहेका छन् । गण्डकी प्रदेशमा भने स्वतन्त्र सांसद राजिव गुरुङ उर्फ दीपक मनाङेपनि गठबन्धनमै छन् ।

राष्ट्रिय सभा सदस्यको निर्वाचनमा गण्डकी प्रदेशमा ३ सिटका लागि निर्वाचन हुँदैछ । जसमा नेकपा माओवादी केन्द्रबाट तनह्ँका सुरेश आलेमगर र गोरखाका भुवनबहादुर सुनार तथा नेपाली कांग्रेसका कमला पन्तले उम्मेद्वारी दिएका छन् ।

गण्डकी प्रदेशमा कुल ५ हजार ८ सय ९२ मतभार रहेको छ । प्रदेशमा पाँच दलीय गठबन्धनमा ३ हजार २ सय ५२ मतभार रहेको छ । जुन उम्मेदवार जिताउन काफी छ । विपक्षी नेकपा एमालेको २७ सांसदको १ हथजार २ सय ९६ र ७० अध्यक्ष, उपाध्यक्षको १ हजार २ सय ६० गरी कुल २ हजार ५ सय ५६ र राप्रपाको २ अध्यक्ष उपाध्यक्षको ३६ मतभार रहेको छ ।

पाँच दलीय गठबन्धनले कम्तिमा ६ सय ९६ मतभारको अन्तरले विपक्षी एमाले उम्मेदवारलाई हराउने दाबी गरेको छ । पाँच दलीय गठबन्धनको पत्रकार सम्मेलनमा नेपाली कांग्रेस गण्डकी प्रदेश सभापति शुक्रराज शर्माले राष्ट्रिय सभा सदस्यको निर्वाचनमा गण्डकी प्रदेशबाट तीनै जनाको जित सुनिश्चित भएको दाबी गरे । उनले आफूहरुको नीति सकभर अर्काको मत चोर्ने तर आफ्नो मत भने कुनैपनि हालतमा संरक्षण गर्ने भएको बताए । हामी गठबन्धनलाई जिताउन एकताबद्ध छौं,उनले भने,‘अहिले गठबन्धनको विकल्प छैन, त्यसैले एकमतका साथ हामी हाम्रा गठबन्धनलाई जिताउँछौं ।’ संविधानमाथि परेको संकट टार्नका लागि बनेको गठबन्धनको आवश्यक्ता अझै रहेको उनले बताए । ‘गठबन्धन नगरे फेरीपनि प्रतिगमन दोहोरिन्छ र संकट आउँछ, एक्लाएक्लै लड्दा प्रतिगमन रोक्ने सामथ्र्य पुग्दैन, त्यसैले हामी गठबन्धनलाई निरन्तरता दिन चाहन्छौं, यसलाई टुट्न दिदैनौं’–उनले भने ।

नेकपा माओवादी केन्द्र गण्डकी प्रदेश संसदीय दलका नेता हरिबहादुर चुमानले गण्डकीका पाँचदलीय गठबन्धनका नेताहरुको जित सुनिश्चित भएको बताए ।

नेकपा माओवादी केन्द्रका तर्फबाट राष्ट्रिय सभा सदस्यका उम्मेदवार बनेका सुरेश आलेमगरले प्रतिगमनलाई परास्त गर्नका लागि पाँचदलीय गठबन्धनका उम्मेदवारलाई जिताउनुपर्नेमा जोड दिए । ‘हामीबीच बैचारिक मतभिन्नताहरु छन्, यो हिजोपनि थियो र आजपनि छ । तर अहिलेको आवश्यक्ता भनेको प्रतिगमनलाई परास्त गर्नु हो । प्रतिगमनको खतरा नटरिसकेकाले पाँचदलीय गठबन्धनका उम्मेदवारलाई जिताउनै पर्छ’–उनले भने ।

अर्का उम्मेदवार भुवनबहादुर सुनारले प्रतिगमनलाई घुँडा टेकाउँदै उत्पीडित जनताको आवाज बुलन्द गर्न आफ्नो उम्मेदवारी भएको बताए ।

नेकपा एकीकृत समाजवादीका पोलिट्ब्यूरो सदस्य तथा प्रदेश उपसचिव श्रीनाथ बरालले प्रतिगमनकारीले फेरी टाउको उठाउन नसक्ने स्थिति सिर्जना गर्नका लागि पाँचदलीय गठबन्धनलाई जिताउन पार्टी प्रतिबद्ध रहेको बताए ।

राष्ट्रिय जनमोर्चाका गण्डकी प्रदेश अध्यक्ष शंकर बरालले पाँचदलीय गठबन्धनलाई जिताउन आफ्नो पार्टी प्रतिबद्ध रहेको बताए ।

पाँचदलीय गठबन्धनका उम्मेदवारको पक्षमा मतदानका लागि अपिल गर्न आयोजित पत्रकार भेटघाटमा पाँचदलीय गठबन्धनका प्रदेशस्तरीय नेताहरु । तस्बिर ः उमेश पुन÷नागरिक

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।