पोखरा उद्योग वाणिज्य संघको चुनावमा २३६५ मत खस्यो, मतगणना भोलि

पोखरा उद्योग वाणिज्य संघको नया नेतृत्वका लागि शनिबार भएको मतदानमा ७५ प्रतिशत मत खसेको छ । संघको ३३ औं महाधिवेशनमार्फत नया नेतृत्वका लागि आज विहान १० बजेदेखि अपराह्न ५ बजेसम्म भएको मतदानमा ७४.९८ प्रतिशत मत खसेको निर्वाचन समितिले जनाएको छ । निर्वाचन समितिका संयोजक तीर्थ श्रेष्ठका अनुसार कुल ३ हजार १ सय ५४ मत मध्ये शनिबार भएको मतदानमा २ हजार ३ सय ६५ मत खसेको छ । अपराह्न ५ बजेसम्म भनेपनि सो समयसम्म लाईनमा बसेकाहरुलाई साँझ ६ बजेसम्मै मतदान गर्न दिइएको निर्वाचन समितिका संयोजक तीर्थ श्रेष्ठले जानकारी दिए । आज सम्पन्न मतदानको मतगणना भोलि विहान ८ बजेदेखि हुने निर्वाचन समितिले जनाएको छ ।

मतदाता उद्योगी÷व्यवसायीहरुले दिनभर लाईनमा बसेर मतदान गरेका थिए । उनीहरुले विश्वव्यापी महामारीका रुपमा फैलिएको नोभल कोरोनाई भाईरस (कोभिड–१९) प्रति बेपर्वाहहुँदै मतदान गरेका हुन् । मतदाताहरुले मुखमा मास्क लगाएपनि भौतिक दुरी कायम नगरी बाक्लो भीडकाबीच लाईन बसेर मतदानमा सहभागि भए । कतिपयले मास्क नै नलगाई सहभागि भए भने मास्क लगाएकाहरुलेपनि नाकमुनी, चिउँडो मुनी मास्क पु¥याउँदै बसेका थिए ।

कोरोनाको जोखिमका बाबजुद भएको निर्वाचनमा उमेद्वारहरुले मतदान क्षेत्र वरपर मत माग्नका लागि आ–आफ्ना मान्छे खटाएका थिए । उनीहरुले मतदातालाई भौतिक दुरी कायम नगरी मत माग्नुका साथै उमेद्वारको ब्रोसर र पम्प्लेट, कार्डलगायत वितरण गरेका थिए ।

संघको नया नेतृत्वका लागि वर्तमान बरिष्ठ उपाध्यक्ष नारायण कोईराला र वर्तमान उद्योगतर्फकी उपाध्यक्ष विन्दु कोईराला सुवेदी प्यानलसहित चुनावी मैदानमा छन् । संघको उद्योग उपाध्यक्षमा कोईराला प्यानलबाट चिनुकमारी गुरुङ र स्वतन्त्र उमेद्वार गोकर्ण कार्की चुनावी मैदानमा छन् । वाणिज्य तर्फको उपाध्यक्षमा कोईराला प्यानलबाट वर्तमान महासचिव अर्जुन पोखरेल उमेदवार छन् सुवेदी प्यानलबाट वर्तमान कार्यकारिणी सदस्य सोवित पौडेल उमेदवार छन् ।

संघको महासचिवमा कोईराला प्यानलबाट वर्तमान कोषाध्यक्ष सुरेन्द्रमान बिजुक्छे र सुवेदी प्यानलबाट धनीराम बराल उमेदवार बनेका छन् । उपमहासचिवमा कोईराला प्यानलबाट वर्तमान सदस्य केशवबहादुर खत्री र सुवेदी प्यानलले गृहलक्ष्मी ग्यास उद्योगका सञ्चालक धर्मराज बर्तौला, कोषाध्यक्षमा कोईराला प्यानलबाट वर्तमान सदस्य बलराम आचार्य तथा सुवेदी प्यानलबाट वर्तमान सदस्य तारानाथ ढुंगाना उमेदवार छन् ।

संघको सदस्यका लागि कोईराला प्यानलबाट कुमारी मुना बास्तोला, दीनेशचन्द्र बास्तोला, ऋषिराम भण्डारी, रामेश्वर अधिकारी, कीर्तिबल्लभ त्रिपाठी, हरिराज पन्त, देवेन्द्र केसी, शोभा गौतम, भरत केसी, सुदनबहादुर कोइराला रहेका छन् ।

सुवेदी प्यानलबाट सदस्यमा पवित्रा गुरुङ, विनोद केसी, रामप्रसाद गौतम, उत्तम सेवक कार्कीले उमेदवारी दिएका छन् । १० खुल्ला सदस्यमा ४ जनाको मात्रै उमेदवारी रहेको छ भने वस्तुगत र एशोसियट सदस्यतर्फ भने यो प्यानलबाट उमेदवारी घोषणा भएको छैन ।

संघको बरिष्ठ उपाध्यक्षमा वर्तमान वाणिज्यतर्फका उपाध्यक्ष पवन प्रजापति निर्विरोध निर्वाचित भइसकेका छन् । त्यस्तै, एशोसियट सदस्यमा कोइराला प्यानलबाट उमेदवार भएका हरिहर सापकोटा र हर्कबहादुर अधिकारी (मिराज) निर्विरोध चयन भइसकेका छन् ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।