पोखरा, मंसिर २३
नेकपा एकीकृत समाजवादी (नेकपा एस)का अध्यक्ष माधवकुमार नेपालले एनसेल बिक्री काण्ड हेर्दाहेर्दैको नाङ्गो डकैती भएको टिप्पणी गरेका छन् । समाजवादी प्रेस संगठन नेपाल, कास्की शाखाले शनिबार पोखरामा आयोजना गरेको पत्रकार भेटघाट कार्यक्रममा बोल्दै पूर्व प्रधानमन्त्रीसमेत रहेका नेकपा एसका अध्यक्ष नेपालले एनसेल बिक्री सिधै हेर्दाहेर्दैको डकैती भएको बताएका हुन् । एनसेल बिक्री काण्डमा सामेल कोहिपनि छुट्न नहुने भन्दै उनले भने,‘यो लुट, ब्रह्मलुट, सिधै हेर्दाहेर्दैको नाङ्गो डकैती हो । यसमा संलग्न कोहिपनि नछुटोस् ।’
अध्यक्ष नेपालले एनसेलको स्वामित्व अहिले बेच्ने अनि ६ वर्षपछि हस्तान्तरण गर्ने भन्ने सम्झौता नै जालसाजीपूर्ण भएको टिप्पणी गरे । अहिले बेचेर ६ वर्षपछि नेपालीको हातमा आइसकेकाले पुरानो कानून लागु हुँदैन भन्ने देखाउने षडयन्त्रमूलक काम गरेको उनको आरोप छ । उनले एनसेल बिक्रीलाई बैधानिकता दिन सो अनुकुल कानून बनाउन, भएका प्रावधानमा संसोधन गर्न भनेर मस्यौदासमेत निर्माण भएको जानकारीमा आएको दाबी गरे । यी सबै कुराहरुको छानविन गर्नुपर्ने भन्दै उनले भने,‘यसमा अहिले होस् वा पहिलेपहिलेपनि, कसैले आँखा चिम्लेको छ भने त्यसको छानविन गरेर कुनैपनि हालतमा दण्डित गर्नुपर्छ ।’ एनसेलमा बदमासी गर्नेहरुलाई सजाय दिएर सरकारले देशको हितको रक्षा गर्नुपर्ने उनको भनाई छ ।
अध्यक्ष नेपालले एनसेल काण्डमा संलग्नलाई कारवाही गर्दा विदेशी लगानी निरुत्साहित नहुने बताए । उनले भने,‘विदेशी लगानीलाई निरुत्साहित गर्ने होईन । प्रोत्साहित नै गर्नुपर्छ, तर दोषीलाई भने छाड्न हुँदैन ।
अध्यक्ष नेपालले युवाहरुमा बढेको निराशा तथा पार्टी र नेताप्रति बनेको नकारात्मक धारणाको फाईदा उठाउने प्रयास गरिरहेको आरोप लगाए । ‘युवाहरुमा बढेको फ्रष्टेसन, निराशालाई देखाएर, पार्टी र नेताहरुप्रति बनेको नकारात्मक धारणालाई देखाएर प्रतिगामी तत्वहरुले टाउको उठाउन थालेका छन् । ईतिहासको कालखण्डमा हराईसकेका शक्तिहरुले टाउको उठाउन खोजिरहेका छन् । राजतन्त्र फर्काउन खोजीरहेका छन् । यो कदापी स्वीकार्य हुँदैन । सफल हुँदैन ।’–उनले भने । राजतन्त्र फर्काउँदैमा सुशासनपनि नहुने र अर्थतन्त्रपनि सबल नबन्ने उनले दाबी गरे । समस्या राष्ट्रपतीमा रहेको छ कि प्रधानमन्त्रीमा छ ? उनले प्रश्न गर्दै भने,‘प्रधानमन्त्री बन्ने चाहना छ भने पार्टी बनाउने, चुनावमा भाग लिने, जितेर प्रधानमन्त्री बन्ने । राष्ट्रपतिमा आँखा किन गाड्नुप¥यो । जनताको छोराछोरी राष्ट्रपति बनिरहेका छन् । यसप्रति किन आँखा गाड्नुप¥यो ? कि राजतन्त्र कालमा लिएको १५ प्रकारको नातेदारलाई दिने तलब, भत्ताले पिरोलेको हो ? ।’
अध्यक्ष नेपालले अर्थतन्त्रमा कहिं न कहिं त्रुटी रहेकाले अर्थतन्त्र पुरानो लयमा नफर्किएको बताए । यस कारणले उद्योगी, व्यवसायीको हालत खराब भएको बताउँदै उनले भने,‘यसको समाधानका लागि व्याजदर घटाउने, ऋण तिर्ने म्याद थप्ने, व्याजलाई ऋणमा बदल्नेलगायत गरेर राहत दिनेबारे सरकारले सोंच्नुपर्ने बताए । तर संकटमा परेको अर्थतन्त्रलाई मौकाको रुपमा प्रयोग गरेर अनुचित माग गर्नेहरुलाई दण्डित गर्नुपर्ने उनको भनाई छ । दुर्गा प्रसाईंको नाम नलिई उनले भने,‘ऋण लिने तर ऋण नतिर्ने । चुक्ता गर्दिन भनेर घोषणा गर्ने अनि ऋण तिर्दिन भन्नेले दण्ड भोग्नु नपर्ने । यस्ता वाहियात कुराहरु सुन्नमा आइरहेको छ, यो कदापी हुन सक्दैन । उनीहरुलाई दण्डित गर्नुपर्छ ।’
अध्यक्ष नेपालले वर्तमान गठबन्धन पाँचै वर्ष टिक्ने दाबी गरे । सानातिना समस्याले गठबन्धन सरकार नढल्ने बताउँदै उनले भने,‘यो गठबन्धन पाँचै वर्ष टिक्छ । कसैले हल्लाउन सक्दैन ।’
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
पर्यटन विभागले यही कात्तिक ११ देखि १५ गतेसम्म देशका विभिन्न स्थानमा भारी…
