पोखरामा होमवर्क नगरेको भन्दै शिक्षकबाट विद्यार्थी कुटिए, शिक्षक पक्राउ

पोखरा, जेठ २१

पोखराका एक विद्यार्थीलाई कुटपीट गरेको आरोपमा एक जना शिक्षक पक्राउ परेका छन् । पोखरा महानगरपालिका वडा नम्बर–३२ स्थित युनिभर्स ईङ्लिस बोर्डिङ स्कुल कक्षा ५ मा अध्ययनरत ९ वर्षका बालकलाई कुटपीट गरेको आरोपमा कास्कीको रुपा गाउँपालिका वडा नं.–६ खोलाको छेउ बस्ने ३२ वर्षिय सुदीप अधिकारीलाई प्रहरीले पक्राउ गरेको हो ।

पक्राउ परेका शिक्षक अधिकारीले गृहकार्य (होमवर्क) नगरेको तथा अक्षरपनि राम्रो नभएको भन्दै ती विद्यार्थीलाई कुटपीट गरेको कास्की प्रहरीले जनाएको छ । ती शिक्षकले विद्यार्थीको पछाडि पट्टीको भागमा लठ्ठीले प्रहार गरेर घाईते बनाएको भन्दै विद्यार्थीका अभिभावकले प्रहरीमा जाहेरी दिएका थिए । जाहेरीपछि पक्राउ परेका शिक्षक अधिकारीलाई जिल्ला अदालत कास्कीमा उपस्थित गराई बालबालिका सम्बन्धी ऐन २०७५ को दफा ६६ अन्तर्गतको कसुरमा दिन पाँच (५) म्याद थप गरी अनुसन्धान प्रक्रिया अगाडि बढाएको जनाइएको छ ।

यदी उक्त कसुर प्रमाणित भई दोषी ठहर भएमा शिक्षक अधिकारीलाई एक वर्षसम्म कैद र ५० हजार जरिवाना हुने कानूनी व्यवस्था रहेको जनाइएको छ ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।