पोखरा, साउन १२
गण्डकी प्रदेशका भौतिक पूर्वाधार मन्त्री राजिव गुरुङ उर्फ दीपक मनाङे फेरी विवादमा तानिएका छन् । कहिले खेलकुदका पदाधिकारीलाई लात्तले हानेर त कहिले मन्त्रालयकै कर्मचारी कुटेर बारम्बार विवादमा आइरहने मन्त्री मनाङे अहिले फेरी भित्री बस्त्र (गञ्जी) मात्रै लगाएर मन्त्रालय गएपछि पुनः विवादमा तानिएका हुन् ।
गुण्डा नाईकेको छवी संग्ल्याउन राजनीतिमा प्रवेश गरेका उनी आफ्नो पुरानै शैलीका कारण बारम्बार विवादमा आइरहन्छन् । यस पटक भने उनी कर्मचारी वा कसैलाई कुटेर नभई गञ्जीमात्रै लगाएर मन्त्रालय गएपछि आलोचना भइरहेको छ । मन्त्रालयकै केहि व्यक्तिबाट सार्वजनिक भएको सो फोटो अहिले सामाजिक सञ्जालमा भाइरल भइरहेको छ । जहाँ नागरिक अगुवा तथा सर्वसाधारणहरुले मर्यादा विपरित गञ्जीमात्रै लगाएर मन्त्रालयमा गएको भन्दै आलोचना गरेका छन् ।
मन्त्री मनाङे बुधबार गञ्जीमात्रै लगाएर मन्त्रालय गएका थिए । सो क्रममा उनले सेवाग्राहीलाईसमेत भेटेको बताइएको छ । त्यस दिन उनले मन्त्रालयमै मदिरा सेवन गरेको श्रोत बताउँछ । नाम नबताउने शर्तमा श्रोतले भन्यो,‘त्यो दिनमात्र होईन, यसअघिपनि धेरै पटक मन्त्रीज्यूले कार्यालयमै मदिरा सेवन गर्ने गर्नुहुन्थ्यो । बुधबार त गञ्जी लगाएर बस्नुभयो, अनि मदिरा सेवनपनि गर्नुभयो ।’ मनाङेले अति गरेपछि फोटो सार्वजनिक गरिदिएको श्रोतको भनाई छ ।
यसैबीच, मन्त्री मनाङेले पछिल्लो पटक दिएको अभिव्यक्तिपनि विवादमा आएको छ । राइड सेयरिङको पक्षमा ओकालत गर्न पुगेका राइडर्सको समूहले यातायात व्यवसायीले राईड सेयरिङ खारेज गर्न माग गर्दै दिएको ४८ घण्टे अल्टिमेटमबारे जिज्ञासा राखेका थिए । जवाफमा मन्त्री मनाङेले ‘यातायात व्यवसायीले आफूसँग व्ल्याकमेलिङ गर्न खोजेका हुन् । तिनीहरुको माग पूरा गर्दिन । बरु उनीहरुले दिएको समयसीमासम्म ढुक्कले रक्सी खान्छु, सुत्छु’ भनेको भेटमा सहभागिले बताएका छन् । सो क्रममा मनाङेले उनीहरुलाई पनि रक्सी खाएर जान आग्रह गरेको श्रोतको दाबी छ ।
मन्त्री मनाङेका राजनीतिक सल्लाहकार शैलेन्द्रकुमार रावतले भने मन्त्री मनाङे फिल्ड रिपोर्टिङबाट सिधै मन्त्रालय जाँदा कपडा फेर्न नपाएका कारण गञ्जीमा देखिएको दाबी गरेका छन् । उनका अनुसार मन्त्री मनाङे बुधबार पर्वतको डिमुवास्थित बस्तीमा पहिरोको खतराबारे निरीक्षण गरेर फर्किएपछि सिधै मन्त्रालय गएका थिए । मन्त्री मनाङेको बचाउ गर्दै उनले भने,‘फिल्ड निरीक्षणपछि सिधै मन्त्रालय जानुभएको र सो क्रममा सेवाग्राही आइहालेपछि गञ्जीमै भेट्नुभएको हो । उहाँको नियत नभई सेवाग्राहीलाई प्राथमिकता दिदा भुलवश कपडा त्यस्तो पर्न गएको हो ।’
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
पोखरा । शहरी स्वास्थ्य केन्द्र १९ पुरुन्चौरमा निःशुल्क स्त्री रोग परिक्षण स्वास्थ्य…
