पोखरामा भएको स्कुल बस दुर्घटनाबारे अध्ययन गर्न पोखरा महानगरले बनायो छानविन समिति

पोखरा, साउन १४

पोखरामा आज विहान भएको स्कुल बस दुर्घटनाबारे अध्ययन गर्न पोखरा महानगरपालिकाले छानविन समिति बनाएको छ । पोखराको फुस्रेखोला आज विहान करीब ९ बजे पोखराको एलपी देवकोटा मेमोरियल स्कुलको बस दुर्घटना सम्बन्धि अध्ययन गर्न महानगरले शिक्षा निर्देशक हेमप्रसाद आचार्यको संयोजकत्वमा छानविन समिति बनाएको हो ।

छानविन समितिको सदस्यमा उपसचिव कृष्णप्रसाद तिवारी, नगर प्रहरी निरीक्षक पुरुषोत्तम थापा, मे.ई.सरोज चालिसे र शिक्षा अधिकृत रामप्रसाद तिवारी सदस्य सचिव रहेको छानविन समिति बनाएको हो । बस दुर्घटनाबारे अध्ययन गर्न पोखरामा पहिलोपटक छानविन समिति बनाइएको हो । यसअघि कयौं पटक दुर्घटना हुँदापनि छानविन समिति बनाइएको थिएन ।

छानविन समितिलाई दुर्घटना हुनुको कारण, सवारी साधन, चालकको अवस्था, बसमा रहेका विद्यार्थी संख्या, बसमा विद्यार्थी राख्न पाउने संख्यालगायतका बारेमा अध्ययन गरेर ७ दिन भित्रमा प्रतिवेदन बुझाउन भनिएको महानगरपालिकाका प्रमुख प्रशासकीय अधिकृत श्यामकृष्ण थापाले जारी गरेको सूचनामा उल्लेख छ ।

एलपी देवकोटा मेमोरियल स्कुलको बस तिव्र गतिसँगै ब्रेक फेल हुँदा दुर्घटना भएको बताइएको छ । दुर्घटनामा एकै परिवारका आमा र छोराको मृत्यू भएको छ भने २८ जना घाइते भएका छन् ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।