हतारमा गल्ती भएको महशुष भएको छ, त्यसमा रिभ्यू हुन्छ : रवि

सन्देश श्रेष्ठ
पोखरा, पुस १६

राष्ट्रिय स्वतन्त्र पार्टी (रास्वपा)का सभापति रवि लामिछानेले विधि मिचिएको अवस्था भए रास्वपामा राईट टु रिकल हुने बताएका छन् । सूर्य दर्शन सहकारी ठगी मुद्दामा तारिख बुझ्न पोखरा आएका उनले बुधबार पोखराका पत्रकारहरुसँग कुरा गर्दै सोमबार बुझाइएको समानुपातिक उम्मेदवारको नामावलीमा विधि मिचिएको पाईए राईट टु रिकल गरिने बताएका हुन् ।

रास्वपाले बुझाएको समानुपातिक उम्मेदवारको बन्दसूचीमा नेताका आफ्ना आफन्त रहेको पाइएको छ । जसका कारण अहिले सामाजिक सञ्जालमा नयाले नै विधि मिचेको भन्दै आलोचना भइरहेको छ । सो प्रसङ्गमा बोल्दै सभापती लामिछानेले विधि भन्दा बाहिर पार्टी नजाने स्पष्ट पारे । रास्वपामा विधि छ, विधिमा रास्वपा हिंड्छ, विधिभन्दा बाहिर हामी कुनै हालतमा जाँदैनौं,उनले भने,‘कथमकदाचित यी सबै विधिहरू नाघिएको रहेछ भने राइट टू रिकलको व्यवस्था रास्वपाको विधानले नै गरेको छ ।’ उनले रास्वपा परिवारवादमा स्पष्ट रहेको बताए ।

सभापती लामिछानेले छोटो समयमा समानुपातिक उम्मेदवारको बन्दसूची तयार पार्नु परेकाले त्रुटीहरु भएका हुनसक्ने बताए । तर त्यसलाई सच्याईने उनको भनाई थियो । बन्दसूची बुझाउने बेलामा कुलमानसँग सहमती गर्दै थियौं,उनले अगाडि थपे, यस्तै केहि कारणले केही समस्या भएको हुनसक्छ । र यसो भएको भए त्यसलाई रिभ्यू गरिन्छ ।’

‘हामी सचेत छौं । तर समयले गर्दा अरु दुई दिन पनि अरु केही विवाद छन् कि भनेर हामी वेट गरेका छौं । यो दुई दिनमा जति पनि जायज गुनासो छन्, सबै सम्बोधन गर्दौं । किनभने हामीले बोक्नुपर्ने एक जना मान्छे पनि छैन पार्टीमा,’ लामिछानेले भने ।

सभापती लामिछानेले रास्वपाले भागवण्डामा विस्वास नगर्ने बताए । बालेन र रवीबीच पार्टी सभापती र भावी प्रधानमन्त्री भनेर भागवण्डा गरेको भन्दै विपक्षीहरुले कटाक्ष गरिरहेको बेला उनले यसलाई भागवण्डा नभनिने बताए । यो जिम्मेवारी बाँटफाँट मात्र हो,उनले भने,‘पार्टी कसले चलाउने ? पार्टीले बहुमत ल्याएको खण्डमा प्रधानमन्त्री को बन्ने ? भन्ने विषयमा जिम्मेवारी बाँडफाँट गरेका हौं ।’

फरक प्रसङ्गमा उनले रास्वपाले आफूलाईबाहेक अरुका लागि निर्वाचनमा भोट नमाग्ने स्पष्ट पारे । पछिल्लो समय चुनावी गठबन्धन गरेर एकले अर्कोलाई भोट माग्ने गरेकोतर्फ ईंगित गर्दै उनले भने,‘रास्वाले आफ्नो पार्टीलाई, आफ्नो उम्मेदवारलाई र आफ्नो चुनाव चिह्नमा भन्दा अरुलाई भोट माग्दैन । रास्वपा हो, घण्टी हो, त्योभन्दा अर्को पार्टी र चुनाव चिह्न छैन र हुँदैन । कसैका लागि भोट पनि मागिन्न ।’

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।