उपसभापतिमा गण्डकी प्रदेशका मुख्यमन्त्री सुरेन्द्रराज पाण्डेको उमेद्वारी दर्ता

गण्डकी प्रदेशका मुख्यमन्त्री तथा नेपाली कांग्रेसका केन्द्रीय सदस्य सुरेन्द्रराज पाण्डेले उपसभापति पदमा उम्मेदवारी दिएका छन् ।

पार्टीलाई थप एकताबद्ध, सुदृढ र समयानुकूल बनाउँदै अघि बढाउन आफूले उपसभापति पदमा उम्मेदवारी दिएको पाण्डेले बताए। पार्टीभित्र र बाहिरबाट कांग्रेसको एकता र सुदृढ संगठन निर्माणको आवश्यकता निरन्तर उठिरहेको भन्दै उनले पार्टीका सबै तह र पुस्ताका नेता–कार्यकर्तालाई संवाद, सहकार्य र साझा उद्देश्यका आधारमा एउटै सूत्रमा जोड्नु आफ्नो प्राथमिकता हुने बताए। महाधिवेशनका क्रममा प्राप्त हुने सुझाव, विचार, संवाद र सहकार्यलाई आगामी राजनीतिक यात्राको महत्वपूर्ण आधारका रूपमा लिएको पाण्डेको भनाइ छ। उनले कांग्रेसका सम्पूर्ण महाधिवेशन प्रतिनिधि, पार्टी सदस्य, शुभेच्छुक तथा शुभचिन्तकको साथ र सहयोगबाट आफू उपसभापति पदमा निर्वाचित हुने विश्वास व्यक्त गरे।

कास्कीका जीवन परियारले पनि सोही पदमा उमेद्वारी दर्ता गराएका छन् । कास्कीबाट उपसभापति पदमा निवर्तमान सहमहामन्त्री जीवन परियार र प्रवक्ता रहेका देवराज चालिसेले दावी गरेका छन् । त्यसैगरी सहमहामन्त्री खुलातर्फको क्लस्टरमा कास्की कांग्रेसका सभापति किशोरदत्त बरालले उमेदवारी दिने तयारी गरेका छन् । कास्कीबाट केन्द्रीय सदस्यमा गण्डकी प्रदेशका सभापति शुक्रराज शर्मा, युवा उद्यमी कास्कीका किरण केसी, लक्ष्मी पाण्डे, नम्रता बराल, सरिता तिमिल्सिना पंगेनी, मीनबहादुर गुरुङ, देवीजङ्ग गुरुङ र युवा क्लस्टरमा सौगात थापाले उमेदवारी दिने तयारी गरेका छन् । महाधिवेशनमा कास्कीबाट १०९ जना महाधिवेशन प्रतिनिधि सहभागी छन् । जसमा कास्की क्षेत्र नं. १ बाट ३१ जना, २ मा ३८ जना र क्षेत्र नं. ३ बाट ४० जना सहभागी रहेको निर्वाचन समितिले जनाएको छ ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।