दर्शन फाउण्डेशन, पोखराले पर्वतको मल्लाजमा निःशुल्क आँखा परीक्षण शिविर सम्पन्न गरेको छ ।
पर्वत जिल्लाको जलजला गाउँपालिका–३, मल्लाज, माझफाँटस्थित मल्लाज स्वास्थ्य चौकीमा भएको शिविरमा ४११ जनाको आँखा परीक्षण गरिएको थियो । जसमध्ये २१ जनामा मोतियाबिन्दुको समस्या देखिएको र उनीहरूलाई शल्यक्रियाका लागि हिमालय आँखा अस्पताल, पोखरा सिफारिस गरिएको आयोजकले जनाएको छ । शिविरमा निःशुल्क चश्मा, औषधि वितरण तथा परामर्श सेवा प्रदान गरिएको थियो । शिविरमा ग्रामीण क्षेत्रका ज्येष्ठ नागरिक, महिला, दलित तथा आर्थिक अवस्था कमजोर भएका नागरिकहरूको उल्लेखनीय सहभागिता रहेको बताइएको छ ।दर्शन फाउण्डेशनका अध्यक्ष पितम बहादुर सेनले सामाजिक सेवामार्फत समुदायमा स्वास्थ्य सचेतना अभिवृद्धि गर्ने उद्देश्यले कार्यक्रम आयोजना गरिएको जानकारी दिए ।
आगामी दिनमा पनि यस्ता सामाजिक तथा स्वास्थ्यसम्बन्धी कार्यक्रमलाई निरन्तरता दिइने उनले बताए । त्यसैगरी, जलजला गाउँपालिकाका उपाध्यक्ष दिपक आचार्यले ग्रामीण क्षेत्रमा सञ्चालन गरिएका यस्ता स्वास्थ्य शिविरले स्थानीय नागरिकलाई प्रत्यक्ष लाभ पुगेको बताउँदै सामाजिक संघसंस्थाले स्वास्थ्य, शिक्षा तथा जनचेतनामूलक कार्यक्रमलाई प्राथमिकतामा राख्नुपर्ने धारणा व्यक्त गरे । उनले दर्शन फाउण्डेशन र सहयोगी संस्थाहरूले गरेको कार्य प्रशंसनीय रहेको उल्लेख गर्दै आगामी दिनमा गाउँपालिकाको तर्फबाट आवश्यक सहयोग रहने प्रतिबद्धता व्यक्त गरे ।
कार्यक्रममा जलजला गाउँपालिका वडा नं. ३ का वडा अध्यक्ष एकिन्द्र खत्री, हिमालय आँखा अस्पतालका नेत्र अधिकृत दिनेश बानियाँ, मल्लाज स्वास्थ्य चौकीका प्रमुख पवित्रा रेग्मी, दर्शन फाउण्डेशनका सचिव मदन मल्ल तथा कार्यक्रम संयोजक याम बहादुर जिसीलगायतले मन्तव्य व्यक्त गरेका थिए । उक्त शिविरमा हिमालय आँखा अस्पताल, घारीपाटन पोखराले प्राविधिक सहयोग गरेको थियो ।
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
विद्यार्थीहरूको नेतृत्व क्षमता विकास गर्ने उद्देश्यले पोखराको मोहरियाटोलस्थित विन्ध्येश्वरी आदर्श बोर्डिङ स्कुलमा…
