भोजनका लागि भजन सन्ध्याबाट रकम सङ्कलन

मानव सेवा आश्रम पोखरा- १७ छोरेपाटनमा आयोजित भोजनका लागि भजन सन्ध्या कार्यक्रमको उद्घाटन गर्दै गण्डकी प्रदेशका सभामुख नेत्रनाथ अधिकारी । तस्वीर : हरि बास्तोला

गण्डकी। पोखराको छोरेपाटनस्थित मानवसेवा आश्रमका लागि रु. पाँच लाख ५० हजार सहयोग प्राप्त भएको छ । आकाशलाई छानो र धर्तीलाई विछ्याउना बनाउन बाध्य सडक मानवलाई उद्धार गर्ने लक्ष्यका साथ आश्रम निर्माण गरिएको थियो । आश्रममा आश्रितको भोजनका लागि भजन सन्ध्या कार्यक्रमबाट रु. पाँच लाख ५० हजार सङ्कलन गरिएकोे हो ।

कार्यक्रममा उपस्थित विभिन्न क्षेत्रमा आवद्ध ३० जनाले खानाका लागि उक्त रकम दिएका थिए । तीमध्ये पूर्वमन्त्री हरि पाण्डेलले रु. एक लाख ४२ हजार, सिका शेरचन र विष्णु गुरुङले जनही रु. एक लाख ११ हजार १११, गोरख जैसवालले रु. ३५ हजार पाँचसय, सोनिया गुरुङले भवन निर्माणका लागि रु. पचास हजार सहयोग गरेका थिए । विसं २०७४ चैत १७ मा तत्कालीन पर्यटनमन्त्री स्व. रवीन्द्र अधिकारी, आश्रमका संस्थापक अध्यक्ष रामजी अधिकारी र पोखरा आश्रमका संरक्षक डा गोविन्द टण्डनले सहरका विभिन्न स्थानमा कष्टकरजीवन बिताउन बाध्य २३ जनालाई प्रवेश गराएर सेवा सञ्चालन गरिएको आश्रममा हाल १५० जना छन् ।

आश्रममा आश्रितकोे एक छाक खानाका लागि रु. १५ हजार ५००, विशेष खानाका लागि रु. २२ हजार ५०० र एक दिनको खानाका लागि रु. ३५ हजार ५०० जम्मा गर्नुपर्ने व्यवस्था गरिएको आश्रमका कोषाध्यक्ष होमनाथ तिमिल्सिनाले जानकारी दिए। भजन सन्ध्या शुभारम्भ गरेका गण्डकी प्रदेशका सभामुख नेत्रनाथ अधिकारीले सडकमा कष्टकर जीवन बिताउन बाध्य मानवको सेवामा समर्पित यस आश्रमले राज्यले गर्नुपर्ने दायित्व निर्वाह गरेको बताए ।

संविधानले व्यवस्था गरेको जनताका मौलिक अधिकार रक्षाका लागि राज्यले नै पहल गर्नुपर्नेमा जोड दिँदै उनले विकास निर्माणसँगै नागरिकका आधारभूत आवश्यकता पूरा गर्न तीनै तहका सरकार जिम्मेवार हुनुपर्ने आवश्यकता औँल्याए । गण्डकी प्रदेशका स्वास्थ्य तथा जनसङ्ख्यामन्त्री मधुमाया अधिकारी गुरुङले यो प्रदेश सडक मानवमुक्त प्रदेश घोषणा भइसकेकाले अब यसको निरन्तरताका लागि सबैको साथ र सहयोग आवश्यकपर्ने बताए ।उनले आश्रममा आश्रित १५० जनाको स्वास्थ्य बीमा प्रदेश सरकारले गर्ने प्रतिबद्धतासमेत व्यक्त गरे।

विजयपुरस्थित नेपाली सेना मध्यकमाण्डका सेनापति बाबुराम श्रेष्ठले जन्मदाता र जन्मभूमिको कर्तव्यप्रति जिम्मेवार हुने खालको नैतिक शिक्षा आवश्यक भएको बताए । गण्डकी विश्वविद्यालयका सल्लाहाकार प्रा डा मेधिनिप्रसाद भण्डारीले मानवसेवाजस्तो धर्म अरु कुनै नहुने बताउँदै राष्ट्र निर्माणमा यस आश्रमको महत्वपूर्ण भूमिका रहेको बताए । आश्रमका परिकल्पनाकार रामजी अधिकारीले एक दशकको अवधिमा संस्थाले छ हजार ३७२ जनालाई सेवा प्रदान गरेकामा दुई हजार ४५९ जनाको पारिवारिक पुनःमिलन भएको, एक हजार ७१७ उपचारपछि स्वेच्छाले घर फर्केको, ३६२ लाई पुनरस्थापन गरिएको, १७२ जनालाई पुनःउद्धार गरेर ल्याइएको र ६४८ जनाको निधन भएको र हाल आश्रित एक हजार ५६७ जना रहेको जानकारी दिए।

विसं २०८२ सम्ममा नेपाललाई सडक मानवमुक्त राष्ट्रघोषण गर्ने अभियान संस्थाले लिएको बताउँदै अध्यक्ष अधिकारीले पोखरा–२५स्थित हेमजामा लगभग रु. २० करोडको लागतमा सुविधा सम्पन्न आश्रम निर्माण गर्न लागिएको र यसका लागि सहयोग गर्न सबैसँग अनुरोध गरे ।मुलुकका सतै प्रदेशअन्तर्गत १७ कार्यालय र २४ शाखामार्फत उद्धारको कार्य भइरहेको बताउँदै उनले यस संस्थाले दातृराष्ट्रको कुनै पनि सहयोग नलिइ आन्तरिक रुपमै समस्या समाधान गर्दै आएको बताए। बेसहारा, अशक्त, असहाय, अनाथ, अभिभावकविहीन, मानसिक तथा शारीरिक रुपमा कमजोर सडक आश्रित मानवलाई उद्धार गरी उपचार पश्चात आश्रममा राख्ने र आयआर्जनमा समेत लगाउने गर्दै आइएको छ ।गण्डकी प्रदेशसभा सचिव हरिराम पोखरेल, संस्थाका उषा गोशली, आश्रमका प्रमुख होमनाथ तिमिल्सिना, राजन सापकोटालगायतले संस्थाले निर्वाह गरेको खेलेको भूमिका बारे चर्चा गरेका थिए ।रासस

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।