होटल संघ पोखराले नेपाली नया वर्षको अवसरमा सडक महोत्सव गर्ने

पोखरा, चैत २२

होटल संघ पोखराले नेपाली नया वर्षको अवसरमा सडक महोत्सव गर्ने भएको छ । यसअघि फेवा नव वर्ष महोत्सव गर्दै आएको होटल संघ पोखराले रेष्टुरेण्ट एण्ड बार एशोसियसन अफ नेपाल (रेवान) पोखराकै शैलीमा सडक महोत्सव गर्ने भएको हो । रेवान पोखराले हरेक अंग्रेजी नया वर्षमा ‘सडकमै खाऔं, सडकमै नाचौं, सडकमै रमाऔं’ भन्ने नाराका साथ पोखरा सडक महोत्सव आयोजना गर्दै आएको छ ।

होटल संघ पोखरालेपनि यस वर्ष नेपाली नया वर्षको अवसरमा यहि चैत ३० गतेदेखि बैशाख १ गतेसम्म सडक महोत्सव गर्ने मंगलबार पोखरामा आयोजित पत्रकार सम्मेलनमा जानकारी दिईयो । होटल संघले यसअघी कोमागाने पार्कमा महोत्सव आयोजना गर्ने गरेको थियो । तर यस वर्षदेखि रेवानकै शैलीमा लेकसाईडको तीन किलोमिटर क्षेत्रमा सडक महोत्सव गर्ने तयारी गरेको छ ।

‘पर्यटन, संस्कृति र खाना’ भन्ने नाराका साथ हुने महोत्सव कोभिडका कारण थला परेको पर्यटन पुनरुत्थान गर्ने उद्धेश्यले गर्न लागिएको होटल संघ पोखराका अध्यक्ष लक्ष्मण सुवेदीले बताए । उनका अनुसार महोत्सवको उद्घाटन दिन खहरेचोक र ड्यामसाइड गरेर दुई ठाउँबाट एकैपटक ¥याली निस्केर लेकसाइडको मध्य क्षेत्र अम्बोटमा आएर उद्घाटन समारोहमा परिणत हुनेछ । महोत्सव उद्घाटनका लागि दुबै क्षेत्रबाट आमा समूह, क्लवलगायतका सहभागितामा झाँकीसहितको ¥याली निस्किनेछ ।

महोत्सवका मुख्य आकर्षणका रुपमा विभिन्न खानाका परिकार, विविध सांस्कृतिक झाँकी, ख्याती प्राप्त कलाकार तथा स्थानिय कलाकारहरुको प्रस्तुती, लोकदोहोरी, हास्यव्यङ्ग्य, नृत्य, लाइभ कन्सर्टलगायत रहने जनाइएको छ । लेकसाइडका तीन किलोमिटर क्षेत्रमा रहेका होटलहरुले होटल बाहिर नै निकालेर स्टल राख्नेछन् भने त्यहाँ दर्शकले अवलोकन गर्नुका साथै आफूले चाहेअनुसारको स्वाद लिनेछन् ।

महोत्सव हुने दुई दिन अम्बोट र सेन्टर प्वाइन्ट चोकमा दुई वटा ठूला स्टेज बनाइनेछ । जहाँ हरेक दिन दिउँसो लोकदोहोरी, हास्यव्यङ्ग्य, नृत्य र लाइभ पप कन्सर्ट आयोजना हुनेछन् । यसअघी एउटा मात्रै स्टेजमा हुने गरेको कार्यक्रम यस वर्ष दुई स्टेजमा हुने अध्यक्ष सुबेदीले बताए ।

त्यस्तै, महोत्सव हुने तीन किलोमिटर क्षेत्रमा पर्ने ६ वटा चौतारीमा पञ्चेबाजा, रत्यौली, भजन, चुड्कालगायतका कार्यक्रम हुने जनाइएको छ ।

महोत्सवको अवसरमा होटल संघले आफू मातहतका होटलहरुमा ३० प्रतिशत छुट दिने घोषणा गरेको छ । संघका अध्यक्ष सुबेदीले संघमा आबद्ध होटलहरुले छुट दिने ब्यबस्था मिलाइएको बताए । त्यस्तै, रेष्टुरेण्ट तथा बारहरुलेपनि अहिलेको भन्दा शुल्क नबढाउने प्रतिबद्धता जनाएको उनले जानकारी दिए ।

संघका निवर्तमान अध्यक्ष विकल तुलाचनले कोभिडबाट थलिएको पर्यटन पुनरुत्थान गर्न महोत्सव कोशेढुङ्गा सावित हुने विश्वास व्यक्त गरे ।

संघका पूर्व अध्यक्ष भरतराज पराजुलीले पर्यटनमा कोभिडको असर परेपनि पछिल्लो क्रममा पर्यटन पूर्वाधार थपिएकाले पर्यटकको बसाई लम्बिने स्थिति बनेको बताए । त्यसमा महोत्सवले पर्यटक आगमनमा बृद्धि ल्याउने उनको भनाई छ ।

होटल संघले यस वर्ष महोत्सवमा टिकट काट्नुपर्ने बाध्यता हटाएको छ । कोभिडका कारण सबै क्षेत्रमा असर परेकाले सहजै प्रवेश पाउने व्यवस्थाका लागि आफूहरुले प्रवेश निःशुल्क गरेको संघका अध्यक्ष सुबेदीले बताए ।

होटल संघ पोखराले नेपाली नया वर्षमा आयोजना गर्ने सडक महोत्सवबारे जानकारी गराउँदै आयोजक । तस्बिर ः सन्देश÷नागरिक

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।