गण्डकी प्रदेश सभाका ज्येष्ठ सदस्य बस्यालले लिए सपथ

पोखरा, पुस १३

गण्डकी प्रदेशसभाका ज्येष्ठ सदस्य मित्रलाल बस्यालले बुधबार पद तथा गोपनीयताको सपथ लिएका छन् । गण्डकी प्रदेश प्रमुख पृथ्वीमान गुरुङले गण्डकी प्रदेश सभाका ज्येष्ठ सदस्य पर्वत प्रदेश सभा २ बाट निर्वाचित एमाले सांसद मित्रलाल बस्याललाई बुधबार पूर्वाह्न ११ बजे पद तथा गोपनीयताको सपथ खुवाएका हुन् । प्रदेश सभा सदस्य मध्ये ज्येष्ठ सदस्यलाई प्रदेश प्रमुखले संविधानको धारा १८२(५)र प्रदेशसभा निर्वाचन ऐन २०७४ को दफा ७५(१) बमोजिम पद तथा गोपनीयताको सपथ खुवाउनुपर्ने प्रावधान रहेको छ ।

ज्येष्ठ सदस्यको हैसियतमा सपथ लिएका बस्यालले अन्य प्रदेश सभा सदस्यहरुलाई विहीबार पद तथा गोपनीयताको सपथ खुवाउनेछन् । सपथका लागि प्रदेश सभा सदस्यहरुलाई प्रदेश सभा भवन नदीपुरमा विहीबार दिउँसो १ बजे बोलाइएको छ ।

६० सदस्यीय गण्डकी प्रदेश सभामा नेपाली कांग्रेसको २७, नेकपा एमालेको २२, नेकपा माओवादी केन्द्रको ८, राप्रपाको २ र नेकपा एकीकृत समाजवादीको १ सांसद रहेको छ । गण्डकीमा हालै बनेको गठबन्धनको बहुमत रहेको छ । एमालेको २२, माओवादीको ८ र राप्रपाको २ सांसद रहेकाले यहाँ सरकार बनाउन सहजै बहुमत पुग्छ ।

तर गण्डकीमा सरकार गठनको प्रक्रिया शुरु भइसकेको छैन । गण्डकीमा कुनैपनि दलको एकल बहुमत नपुगेकाले प्रदेश प्रमुखले निश्चित समय दिएर दुई वा दुई भन्दा बढी दल मिलेर सरकार बनाउनका लागि आह्वान गर्नुपर्ने हुन्छ । यसरी दुई वा दुई भन्दा बढी दल मिलेरपनि सरकार बनाउन नसकेको खण्डमा मात्रै ठूलो दलको हैसियतमा सरकार बनाउने बाटो खुल्छ ।

यसैबीच, प्रदेश प्रमुख पृथ्वीमान गुरुङले पुस १८ गतेका लागि गण्डकी प्रदेश सभाको अधिवेशन आह्वान गरिसकेका छन् । नेपालको संविधानको धारा १८३ को उपधारा (१) बमोजिम प्रदेश प्रमुखले प्रदेश सभा सदस्य चयनका लागि भएको निर्वाचनको अन्तिम परिणाम घोषणा भएको २० दिनभित्र प्रदेशसभाको अधिवेशन आह्वान गर्ने व्यवस्था छ ।

त्यस्तै, प्रदेशसभाको पहिलो बैठक बसेको १५ दिनभित्र सभामुख र उपसभामुखको निर्वाचन गर्नुपर्ने संवैधानिक व्यवस्था रहेको छ ।

गण्डकी प्रदेश प्रमुख पृथ्वीमान गुरु प्रदेश सभाका ज्येष्ठ सदस्य मित्रलाल बस्याललाई सपथ खुवाउँदै ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।