थारु राष्ट्रिय साहित्य सम्मेलन हुँदै

थारु साहित्य तथा इतिहास अभिलेख गर्न बाँकेमा थारु राष्ट्रिय साहित्य सम्मेलन हुने भएको छ ।

बाँकेको राप्ती सोनारी गाउँपालिकाको फत्तेपुरमा यही माघ २० देखि २३ सम्म हुने सम्मेलनमा थारु साहित्यको समकालीन अवस्थाबारे अन्तरसंवाद, सिर्जनात्मक लेखनको खोजी, थारु मानक भाषा लेखन, संस्कृतिको भेषभुषाबारे अन्तरक्रिया गरी इतिहास अभिलेख गरिने थारु लेखक सङ्घका केन्द्रीय सदस्य शेखर दहितले जानकारी दिए ।

उनका अनुसार, सम्मेलनमा थारु तथा गैरथारु साहित्यकारबीच अनुभव आदानप्रदान गर्ने, प्रकाशित कृतिको विमोचन र बिक्री तथा प्रवद्र्धनसमेत गरिने छ । थारु लेखक सङ्घको आयोजना र स्थानीय थारु गोचाली समाजको व्यवस्थापनमा हुने सम्मेलनमा साहित्य लेखको प्रशिक्षण, थारु गीत, थारु लेख, थारु पुस्तक, विकासमा बरघर, पश्चिम थारुहटमा राजनीतिक फिलिङ्गो, होमस्टेमा थारु समुदाय उद्यमशीलता सम्भाव्यता, आख्यानमा थारु जीवन, बाँकेको थारु साहित्यको अवस्था, थारु साहित्यमा युवा, सिकलसेल एनिमियाँको कहरले जनस्वास्थ्यमा प्रतिकूल असर जस्ता थुप्रै जिल्ला तथा स्थानीयस्तरका थारुका मुद्दालाई लिएर बहस तथा छलफल गरिने थारु गोचाली समाजका महासचिव कालुराम थारुले बताए ।

सम्मेलनमा बाँके जिल्ला र राप्ती सोनारीको मुख्य समस्या तथा समाधानको उपाय, शिक्षाको अवस्था, बर घरको एजेण्डा, नयाँ जनप्रतिनिधिको कामको प्राथमिकतालगायत विषय पनि उठान गरिने उनले जानकारी दिए ।

सम्मेलनमा झापादेखि कञ्चनपुरका थारु साहित्यकारको सहभागिता रहने छ । थारु लेखक सङ्घ नेपालले प्रत्येक वर्ष फरक–फरक जिल्लामा राष्ट्रिय सम्मेलन गर्दै आएको सङ्घका केन्द्रीय सदस्य सोम डेमनडौराले बताए । रासस

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।