होटल पोखरा भिलेज एण्ड स्पा बन्यो चारतारे स्तरको

पोखरा, बैशाख ११

पोखराको चर्चित होटल मध्येको एक होटल पोखरा भिलेज अब चार तारे लेभलको बनेको छ । पोखराका पुराना पर्यटन व्यवसायी हरि शर्मा गैह्रेले आफूले सञ्चालन गर्दै आएको पोखरा हल्लनचोकदेखि करीब एक सय मिटर उत्तरतर्फ रहेको होटल पोखरा भिलेजलाई अपग्रेड गरेर चार तारे लेभलको बनाइएको हो । जसका लागि उनले पछिल्लो पटक ७ तले नया भवन थपेका छन् । जहाँ ४२ वटा कोठाहरु थपिएपछि अब होटल पोखरा भिलेज एण्ड स्पामा कुल ६५ वटा कोठाहरु पुगेको सञ्चालक हरि शर्मा गैह्रेले जानकारी दिए ।

करीब २५ करोड लगानी थपेर सञ्चालनमा आएको पोखरा भिलेज एण्ड स्पामा हनिमून सुईट रुम, ईम्पेरियल सुईट रुमदेखि स्पेसल सुपर डिलक्स रुमसम्म रहेका छन् । त्यसबाहेक सुपर डिलक्स फ्यामिली रुम, स्ट्याण्डर्ड रुमपनि रहेको होटलका जनरल म्यानेजर लक्ष्मण खड्काले जानकारी दिए । उनका अनुसार होटलमा पर्याप्त कार तथा मोटरसाइकल पार्किङदेखि आउट डुअर स्वीमिङ पुलसमेत छन् । त्यस्तै ठूला साना गरेर ३ वटा हलहरु रहेका छन् । जहाँ सभा, सेमिनार, अन्र्तक्रिया, सेलेब्रेसनलगायतका कार्यक्रम गर्न सकिने उनको भनाई छ ।

होटलले हनिमून सुईट रुमसमेत राखेर पोखराको हस्पिटालिटी क्षेत्रमा नया आयाम थपेका छन् । जुन नव विवाहित जोडीहरु हनिमून मनाउन पोखरा आउँदा बस्ने गन्तव्य बन्ने अपेक्षा गरिएको सञ्चालक हरि शर्मा गैह्रेले बताए । ‘हनिमून मनाउन पोखरा आउने जोडीका लागि लक्षित गरेर हनिमून सुईट रुम राखेका हौं’–उनले भने । त्यस्तै पारिवारिक घुमघामका लागि पोखरा आउने पर्यटकलाई केन्द्रीत गरेर होटलले सुपर डिलक्स फ्यामिली रुमसमेत राखेको उनले बताए । उनका अनुसार होटलमा आउनेका लागि देशैभर गाडीको सुविधा दिइनुका साथै हवाई सेवा र गाडीको टिकटपनि त्यहीँबाट बुकिङ गर्न सकिनेछ ।

होटलले परिसर भित्रै कफी सप र रेष्टुरेण्ट सञ्चालनमा ल्याएको छ । जहाँ पर्यटकले आफूले चाहे अनुसारको खाना, खाजा, कफीदेखि डिनरसम्म गर्नसक्ने जनाइएको छ । रेष्टुरेण्टमा नेपाली, कन्टिनेन्टल, ईटालियन, ईण्डियन, चाइनिजलगायतका खानाका परिकारहरु पाक्ने जिएम खड्काले बताए । होटल हाताभित्रै रहेको गार्डेन कफी बारमा बिन्स र बेक्ड कफी सर्भ गरिने उनले जानकारी दिए ।

पोखराको प्रमुख पर्यटकीय गन्तव्य फेवातालको नजिक रहेको यस होटलको बाल्कोनीमा बसेर फेवाताललगायतका प्राकृतिक छटाहरुको समेत दृश्यावलोकन गर्न सकिन्छ ।

यसैबीच होटलको मंगलबार गण्डकी प्रदेशका मुख्यमन्त्री खगराज अधिकारीले उद्घाटन गरे । कार्यक्रममा बोल्दै मुख्यमन्त्री अधिकारीले पर्यटकीय राजधानी पोखरामा गुणस्तरीय पर्यटक भित्राउन पोखरा भिलेजले महत्वपूर्ण भूमिका खेल्ने विश्वास व्यक्त गरे । ‘पर्यटकीय राजधानी घोषणा गरिएको छ, त्यसैले हामीले राजधानी स्तरकै सेवा र सुविधा दिन जरुरी छ । त्यसका लागि पोखरा भिलेज एण्ड स्पाजस्ता होटल तथा रिसोर्ट खुल्दै जानुपर्छ र सेवापनि गुणस्तर बनाउँदै जानुपर्छ ।’

उद्घाटन कार्यक्रममा बोल्दै होटलका सञ्चालक हरि शर्मा गैह्रेले पोखरा भिलेजलाई सेवा क्षेत्रको नमूना बनाउने संकल्प गरे ।

पोखरा पर्यटन परिषदका अध्यक्ष पोमनारायण श्रेष्ठले पोखरालाई ब्राण्डिङ र प्रचारप्रसार गर्न सकिएमा पोखरामा वार्षिक २० लाख पर्यटक भित्राउन सकिने बताए ।

पोखरा–६ का वडाध्यक्ष विष्णुबहादुर भट्टराई र नेपाल पत्रकार महासंघ कास्कीकी अध्यक्ष विमला भण्डारीले सेवा क्षेत्रमा पोखरा भिलेज अब्बल सावित हुन सकोस् भन्ने शुभकामना दिए ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।