पोखरा, बैशाख २१
गण्डकी प्रदेशका मुख्यमन्त्री खगराज अधिकारीले बैशाख २३ गते विश्वासको मत लिने भएका छन् । मुख्यमन्त्री अधिकारीले विश्वासको मत लिनेगरी बैशाख २३ गते आइतबार दिउँसो ३ बजे प्रदेश सभाको बैठक बोलाइएको हो ।
यसअघि मुख्यमन्त्री अधिकारीले विश्वासको मत लिने व्यवस्था मिलाईदिन भन्दै प्रदेश सभा सचिवालयमा पत्र पठाएका थिए । सोहि अनुसार प्रदेश सभाको बैठकको मिति तय गरिएको प्रदेश सभा सचिवालयले जनाएको छ । गण्डकी प्रदेश प्रमुख डिल्लीराज भट्टले गत चैत २५ गते अधिकारीलाई मुख्यमन्त्रीमा नियुक्त गरेका थिए । नियुक्त भएको एक महिना अर्थात ३० दिन भित्र विश्वासको मत लिइसक्नुपर्ने प्रावधान छ । सो अनुसार अधिकारीले बैशाख २४ गतेसम्ममा विश्वासको मत लिइसक्नुपर्नेमा एक दिन अगाडि नै विश्वासको मत लिने तयारी भएको हो ।
सर्वोच्च अदालतले मुख्यमन्त्री अधिकारीलाई विश्वासको मत लिने बाटो खुल्ला गरिदिएको थियो । मुख्यमन्त्रीका लागि दाबी पेस गर्दा सभामुखलाईसमेत गणना गरेको र सोहि आधारमा अधिकारीलाई मुख्यमन्त्री नियुक्त गरिएकाले नियुक्ती खारेज गर्न माग गर्दै गण्डकीका निवर्तमान मुख्यमन्त्री तथा नेपाली कांग्रेस गण्डकी प्रदेश संसदीय दलका नेता सुरेन्द्रराज पाण्डेले सर्वोच्चमा रिट दायर गरेका थिए । सर्वोच्चले भने गण्डकीमा सभामुख बाहेक ५९ प्रदेश सभा सदस्य रहने र त्यसमा ३० सदस्य भए बहुमत पुग्ने भन्दै रिट नै खारेज गरिदिएको थियो ।
सर्वोच्चले बहुमत पुग्ने नपुग्ने विश्वासको मत लिँदा परीक्षण हुने बताएको छ । तर सभामुखबाहेक ५९ सदस्यीय प्रदेश सभा हुने भएकाले ३० बहुमत समर्थित देखिने सर्वोच्चको व्याख्या छ । सर्वोच्चको सोहि व्याख्या अनुसार नै ३० लाई बहुमत मानेर विश्वासको मत लिने मुख्यमन्त्री अधिकारीको तयारी छ । त्यसमा सभामुखलेपनि साथ दिने मुख्यमन्त्रीको विश्वास छ ।
सरकारका प्रवक्ता तथा आर्थिक मामिला मन्त्री हरिबहादुर चुमान भने राप्रपाको समर्थनमा स्पष्ट बहुमत पु¥याईने बताउँछन् । ‘सर्वोच्चको व्याख्या अनुसार नै ३० लाई बहुमत मान्ने तर्कहरुपनि आएका छन् । तर त्यो विकल्पमा जानुपर्ने अवस्था आउलाजस्तो लाग्दैन’–उनले भने ।
तर राप्रपाले भने सत्ता गठबन्धनलाई समर्थन नजनाउने निर्णय गरिसकेको छ । केन्द्रको सो निर्णय प्रदेशमा पनि लागु हुने राप्रपाका नेताहरु बताउँछन् । राप्रपाका सांसद पञ्चराम तमु विश्वासको मत दिने, नदिनेबारे पार्टीले निर्णय गरिनसकेको बताउँछन् । भन्छन्,‘केन्द्रको निर्णय त सत्ता गठबन्धनलाई नसघाउने भन्ने छ । केन्द्रको निर्णय नै प्रदेशमा लागु हुनपनि सक्छ । तर हाम्रो एजेण्डा मानेको खण्डमा पुर्नबिचारपनि गर्न सकिन्छ ।’
६० सदस्यीय गण्डकी प्रदेश सभामा वर्तमान सत्ता गठबन्धनसँग एमालेका २२, नेकपा माओवादी केन्द्रका ८ (सभामुखसहित) र स्वतन्त्रबाट जितेर नेकपा एकीकृत समाजवादी प्रवेश गरेका राजिव गुरुङ उर्फ दीपक मनाङे गरेर ३१ मत छ । सर्वोच्चको फैसला अनुसार विश्वासको मतका लागि सभामुखबाहेक ३० मत नै काफी हुने भएको छ । तर माओवादीमा गणना हुँदै आएका बाबुराम भट्टराई नेतृत्वको नेपाल समाजवादी पार्टीका फडिन्द्र देवकोटाले फ्लोर क्रस गर्ने आशंका सत्तारुढ गठबन्धनले गर्दै आएका छन् । त्यसैले गठबन्धनलाई बलियो बनाउन सत्ता गठबन्धनले राप्रपाको समर्थन खोजिरहेको छ । राप्रपापनि गठबन्धनमा मिसिए सत्ता गठबन्धनमा ३२ सांसद हुन्छन् । विपक्षी नेपाली कांग्रेसका २७ सांसद छन् ।
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
सन्देश श्रेष्ठपोखरा, असोज १५ फ्लाई दुबईले पोखरा–दुबई उडान शुरु गरेसँगै पोखरेली पर्यटन…
