फडिन्द्रले फ्लोर क्रस गरेपछि पाण्डेले पाए विश्वासको मत

पोखरा, जेठ २८

गण्डकी प्रदेशका मुख्यमन्त्री सुरेन्द्रराज पाण्डेले विश्वासको मत पाएका छन् । नेकपा माओवादी केन्द्रको चुनाव चिह्नबाट निर्वाचित नेपाल समाजवादी पार्टी (नेसपा)का प्रदेश सभा सदस्य फडिन्द्र देवकोटाले फ्लोर क्रस गरेर विश्वासको मत दिएपछि मुख्यमन्त्री पाण्डेले विश्वासको मत पाएका हुन् ।

पाण्डेलाई सत्तारुढ नेपाली कांग्रेसका २७ तथा राप्रपाका २, स्वतन्त्र सांसद दीपक मनाङेलेसमेत गरेर ३१ सांसदले विश्वासको मत दिए । सो संख्या प्रदेश सभामा रहेका सदस्यहरुको बहुमत भएकाले पाण्डेले विश्वासको मत पाएको सभामुख कृष्ण धितालले घोषणा गरे ।

पाण्डेले मागेको विश्वासको मतको विपक्षमा नेकपा एमालेका २२ र नेकपा माओवादी केन्द्रका ६ सांसद गरेर २८ जना उभिए ।

मुख्यमन्त्री पm्लोर क्रस गरेर विश्वासको मत दिन लागेका बेला फडिन्द्र देवकोटालाई विपक्षी सांसदहरुले रोकने प्रयास गरेका थिए । तर मार्सल लगाएर सो प्रयास असफल पारिएको थियो । मार्सल लगाएर फ्लोर क्रस गर्न दिएको भन्दै उनीहरुले केहिबेर नाराबाजीसमेत गरेका थिए । उनीहरुले दलीय व्यवस्था जिन्दावाद, दल विरोधी गतिविधि मुर्दावाद, ह्वीप उलंघन गर्न पाईंदैन लगायतका नाराहरु लगाएका थिए ।

यसअघि विश्वासको मत माग्दै मुख्यमन्त्री पाण्डेले प्रदेशको स्थायीत्वका लागि आफूलाई विश्वासको मत दिन आग्रह गरे । प्रदेश सरकार अस्थिर बन्दा जनतामा निराशा र असन्तुष्टी बढेको भन्दै उनले भने,‘डेढ वर्षमा चार पटक सरकार फेरबदल हुनुलाई नागरिकले अस्थिरताका रुपमा लिएका छन् । सरकारको नेतृत्व कसले गरेको छ ? कुन पार्टीले गरेको छ ? भन्दापनि प्रदेश सरकारको स्थायीत्व के छ ? प्रदेश संरचनाले कसरी काम गरिरहेको छ भन्ने नागरिकले नजिकबाट नियालिरहेका छन् ।

मुख्यमन्त्री पाण्डेले नेपालको संविधानको धारा १६८ को उपधारा ५ मा पुग्दा संसद विघटन हुने खतरा रहेकोपनि बताए । ‘त्यसैले उपधारा ३ मा बनेको सरकारलाई उपधारा ४ वमोजिम विश्वासको मत दिनूस्’–उनले भने । बरु प्रदेशको स्थायीत्व र समृद्धिका लागि दलभन्दा माथि उठेर पार्टी र नेताहरुलाई एकाकार हुन उनले आग्रह गरे ।

फ्लोर क्रस गरेर विश्वासको मत पाएपछि नेकपा एमाले संसदीय दलका नेता तथा निवर्तमान मुख्यमन्त्री खगराज अधिकारीले कांग्रेसले सत्ताका लागि संसदको दुरुपयोग गरेको बताए । कांग्रेसलाई सत्ताबाहेक केहिपनि चाहिएको रहेनछ,उनले भने,‘शेरबहादुर देउवा प्रधानमन्त्री भएका बेला संसदमा प्राडो र पजेरो काण्ड भएको थियो नि । हो त्यो आज गण्डकीमा दोहोरियो ।’ यसअघि विश्वासको मत सम्बन्धि प्रस्तावमाथिको छलफलमा भाग लिदै दलीय व्यवस्थामा फ्लोर क्रस गरेर अर्को दलका नेतालाई मत हाल्नु संसदीय विकृति भएको अधिकारीले बताए । नेसपा सांसद फडिन्द्र देवकोटाले फ्लोर क्रस गर्नसक्ने पूर्व आंकलनतर्फ ईंगित गर्दै उनले भने,‘दलसम्बन्धी प्रबन्ध कसरी व्यवस्थित गर्ने भन्ने ऐनले प्रष्ट गरेकाले पद र सत्ताका लागि जेपनि गर्ने विकृतितर्फ जानु हुँदैन । यदि त्यस्तो हुन्छ भने एमालेलाई त्यो मान्य हुँदैन ।’ उनले फ्लोर क्रस गरेर मत दिएपनि त्यो फिर्ता हुने र केहि समयमै पुनः विश्वासको मत माग्नुपर्ने अवस्था आउनेतर्फपनि अधिकारीले सचेत गराए ।

फ्लोर क्रस गरेका नेसपा सांसद देवकोटाले भने मध्यावधी निर्वाचन टार्नका लागि आफूले विश्वासको मत दिएको बताए । सञ्चारकर्मीसँग कुरा गर्दै उनले भने,‘मैले विश्वासको मत नदिएको भए मध्यावधी निर्वाचन हुने खतरा हुने थियो । त्यसैले प्रदेश सभाको स्थायीत्वका लागि र मध्यावधी टार्न पार्टी केन्द्र र प्रदेशको निर्णय अनुसार नै विश्वासको मत दिएको हुँ ।’

फ्लोर क्रस गरेका देवकोटालाई माओवादीले कारवाही गर्ने

फ्लोर क्रस गरेर विश्वासको मत दिएका नेसपा सांसद फडिन्द्र देवकोटालाई माओवादीले कारवाही गर्ने भएको छ । माओवादीको ह्वीप उलंघन गरेर फ्लोर फस गर्दै कांग्रेसका मुख्यमन्त्री सुरेन्द्रराज पाण्डेलाई विश्वासको मत दिएकाले उनलाई पदमुक्त गर्ने नेकपा माओवादी केन्द्र गण्डकी प्रदेश संसदीय दलले जनाएको छ ।

देवकोटा माओवादी चुनाव चिह्नबाट निर्वाचित सांसद हुन् । प्रदेश सभामा उनलाई माओवादी संसदीय दलकै सदस्यका रुपमा राखिएको छ । त्यसैले उनीमाथि ह्वीप लाग्ने माओवादीको दाबी छ । नेकपा माओवादी केन्द्र गण्डकी प्रदेश संसदीय दलका नेता हरिबहादुर चुमानले भने,‘कानुनले स्पष्ट भनेको छ जुन दलको चुनाव चिह्नबाट जितेको हो त्यो दलको ह्वीप लाग्छ । त्यसैले माओवादीको चुनाव चिन्ह लिएर जितेपछि माओवादी संसदीय दलको सदस्य हुनुहुन्छ । त्यसको उलंघन गर्नु भएकाले उहाँमाथि कारवाही हुन्छ ।’

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।