पोखरामा भाईटीका महोत्सव सम्पन्न, १२ देशका ५६ पर्यटकले लगाए भाईटीका

पोखरा, कात्तिक १८

पोखरामा आईतबार आयोजित भाईटीका महोत्सवमा १२ देशका ५६ जना विदेशी पर्यटकले भाईटीका लगाएका छन् । नेपालीको दोश्रो ठूलो चाँड तिहारको मुख्य दिन भाईटीकाको अवसरमा होटल संघ पोखराले हरेक वर्ष आयोजना गर्दै आएको भाईटीका महोत्सवमा आज ती पर्यटकलाई सामुहिक भाईटीका लगाईएको हो । भाईटीका महोत्सवको १७ औं श्रृंखला पोखराको लेकसाईडस्थित ल्याण्डमार्क होटलमा आयोजना गरिएको थियो । महोत्सवमा ईजरायल, रसिया, चीन, पोल्याण्ड, अमेरिका, बेलायत, जर्मनी, स्पेन, भारत र जापान लगायतका देशका पर्यटकले सहभागिता जनाएको संघका अध्यक्ष तथा महोत्सव संयोजक लक्ष्मण सुवेदीले जानकारी दिए । उनका अनुसार पर्यटकको संख्या उल्लेख्य भएपछि तीन चरण गरेर पर्यटकलाई भाईटीका लगाइएको छ ।

‘संस्कृति बचाऔं, पर्यटन प्रबद्र्धन गरौं’ भन्ने मूल नाराका साथ आयोजित महोत्सवमा चिल्ड्रेन होम नेपालका छात्राहरुले भाईटीका लगाईदिए । उनीहरुले विदेशी पर्यटकहरुलाई सप्तरंगी टिका लगाईदिए पश्चात उपहार स्वरुप ढाका टोपी लगाइदिनुका साथै सेलरोटी खुवाए । भाईटीका लगाएर उपहार आदानप्रदान भएपछि तिनै छात्राहरुले तिहारको आकर्षणका रुपमा रहेको देउसीभैलो खेल्दै नाचगानसमेत गरेर मनोरञ्जन प्रदान गरे ।

नेपाली संस्कृति अनुसार भाईटीका लगाएर नाचगानसमेत हेरेपछि पर्यटकहरु प्रफूल्ला भए । उनीहरुले नेपाली संस्कृति र परम्परा गज्जवको भएको प्रतिक्रिया दिए । नेपाली नाम लिला राखेकी एक चिनिया पर्यटकले भने,‘भाइटिका लगाउन पाउँदा एकदम प्रफुल्लित भएँ । पोखरा प्राकृतिक र सांस्कृति दुबै हिसाबले अत्यन्त धनी रहेछ ।’

संघले वर्षौं अघि शुरु गरेको भाईटीका महोत्सव पर्यटकलाई संस्कृति देखाएर आकर्षित गर्ने प्रयास भएको संघका अध्यक्ष लक्ष्मण सुवेदीले बताए । पारिवारिक वातावरण दिएर संस्कृतिमार्फत पर्यटक आकर्षित गर्ने हाम्रो प्रयास हो,उनले भने,‘यसले पर्यटकलाई दोहो¥याएर पोखरा आउने वातावरण बनाउँछ ।’

संघका महासचिव राजेन्द्र ढकालले नेपाली संस्कृति संरक्षण गर्दै पर्यटनको प्रवद्र्धन गर्ने उद्धेश्यले महोत्सव आयोजना गरिएको बताए । उनका अनुसार महोत्सवलाई नेपाल पर्यटन वोर्ड र पोखरा महानगरपालिकाले प्रवद्र्धन गरेको थियो ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।