बाटुलेचौरमा आयोजित श्रीकृष्ण भजन प्रतियोगितामा विभिन्न भजन समूहको प्रस्तुती दिने क्रम जारी

सन्देश श्रेष्ठ
पोखरा, साउन ३१

पोखराको बाटुलेचौरमा आज राष्ट्रिय श्रीकृष्ण भजन प्रतियोगिता जारी छ । शुक्ला साहित्य प्रतिष्ठान पोखरा–१६ बाटुलेचौरको आयोजनामा श्रीकृष्ण जन्माष्टमीको अवसरमा आज राष्ट्रिय श्रीकृष्ण भजन प्रतियोगिताको २६ औं श्रृङ्खला भइरहेको हो । प्रतियोगिताको गण्डकी प्रदेश, सामाजिक विकास, युवा तथा खेलकुद मन्त्री विन्दुकुमार थापाले उद्घाटन गरेका थिए ।

पोखरा–१६ बाटुलेचौर ऐतिहासिक मैदानमा भइरहेको प्रतियोगितामा १६ टिमले प्रतिष्पर्धा गरिरहेका छन् । जसमा आधा भन्दा बढीले प्रतियोगी टिमले प्रस्तुती दिइसकेका छन् । बाँकी प्रतियोगी टिमले प्रस्तुती दिने क्रम जारी छ । प्रतियोगिता रातीसम्मै जारी रहनेछ भने बिजेताको घोषणा आज मध्यरातमा हुनेछ ।

भजन प्रतियोगितामा महेश्वर खनाल भजन समुह तनहुँ, भद्रकाली खैंजडी भजन समुह धादिङ, हरिहर भजन कीर्तन समुह स्याङ्जासहित कास्कीका विभिन्न भजन टोली र विद्यालयका स–साना विद्यार्थी सहभागी भजन टोली सहभागी रहेको प्रतिष्ठानकी अध्यक्ष दुर्गादेवी बस्नेत गौतमले जानकारी दिइन् । प्रतियोगितामा यसअघि कृष्ण भजन मात्रै गाउन दिइदै आएको थियो । तर यस वर्ष भने कृष्ण भजनसँगै महाभारतलाई पनि कथा वस्तु बनाएर भजन गाउन दिईएको छ ।

प्रतियोगितामा दर्शक सहभागीता बाक्लो मात्रामा छ । प्रतियोगिता स्थललाई रंगीचंगी बनाएर दुलहीझैं सिंगारिएको छ । कार्यक्रममा बाटुलेचौर क्षेत्रका आमा समुह, टोल विकास संस्था र विभिन्न जातिय तथा धार्मिक संस्था आ आफ्नो पहिचान झल्कने पोसाकमा सहभागी भएको प्रचार प्रसार उपसमितिका संयोजक संजय थापाले जानकारी दिए ।

यसअघि प्रतियोगिताको उद्घाटन कार्यक्रमलाई सम्बोधन गर्दै सामाजिक विकास, युवा तथा खेलकुद मन्त्री विन्दुकुमार थापाले श्रीकृष्ण भजन प्रतियोगिताले सामाजिक सद्भाव कायम राख्दै कला, साहित्य र संस्कृतिमा टेवा पु¥याउने बताए । उनले प्रतियोगिताका लागि सामाजिक विकास मन्त्रालयले सहयोग गर्ने पनि प्रतिबद्दता जनाए ।

कार्यक्रममा बोल्दै शुक्ला साहित्य प्रतिष्ठान पोखरा–१६ बाटुलेचौरकी अध्यक्ष दुर्गादेवी बस्नेत गौतमले आफ्नो संस्थाले संस्कृति, कला र साहित्यमा योगदान दिइरहेको उल्लेख गरिन् । उनले आगामी दिनमा पनि यस्ता खालका कार्यक्रमलाई निरन्तरता दिने वचनबद्दता व्यक्त गरिन् ।

संस्थाका मानार्थ सदस्य रामबहादुर बानियाले संस्थाले शुरुवाती कालदेखि नै साहित्य र संस्कृतिको क्षेत्रमा संस्थाले अतुलनीय योगदान दिदै आएको उल्लेख गरे ।

उद्घाटन कार्यक्रममा संस्थालाई सहयोग गर्ने विभिन्न व्यक्ति र संघसंस्थाहरुलाई सम्मान गरिएको थियो ।

‘कला सहित्य र संस्कृतिको जगेर्ना हाम्रो गन्तव्य’ भन्ने नाराका साथ २०४५ सालमा जन कवि केशरी धर्मराज थापाको अध्यक्षतामा स्थापना भएको यस प्रतिष्ठानले हरेक वर्ष श्रीकृष्ण जन्माष्टमीका दिन कृष्ण भजन प्रतियोगिता आयोजना गर्दै आएको छ ।

प्रतियोगितामा प्रथम हुनेले १ लाख, द्वितीय हुनेले ७५ हजार, तृतीय हुने समुहले ५० हजार, सान्त्वना हुने समुहले २५ हजार र प्रत्येक सहभागी समुहले ५÷५ हजारका दरले प्रोत्साहन पुरस्कार प्राप्त गर्ने संस्थाका सचिव रामप्रसाद पौडेलले जानकारी दिए ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।