सन्देश श्रेष्ठ
पोखरा, असोज ३०
जेनजी आन्दोलनको मौका छापेर भाग्ने थप ८१ कैदीबन्दीलाई प्रहरीले पक्राउ गरेको छ । भ्रष्टाचार अन्त्य, सुशासन र नेपोबेबीबिरुद्द जेहाद छाडिएको जेनजी आन्दोलन र त्यसबेला कास्की कारागारमा भएको तोडफोड र आगजनीको मौका छोपेर भागेका कैदीबन्दीलाई कास्की प्रहरीले पक्राउ गरेको हो ।
कास्की प्रशासनले जेनजी आन्दोलनका बेला कारागारमा भएको तोडफोड र आगजनीको मौका छोपेर भागेका कैदीबन्दी तथा थुनुवाहरुलाई असोज २० गते भित्रमा स्वतःस्फूर्त फर्किन अपिल गरेको थियो । तर प्रशासनको अपिलको बाबजुद कैदीबन्दी तथा थुनुवाहरु स्वतःस्फूर्त कारागार नफर्किएपछि कास्की प्रहरीले पक्राउ गरेर कारागारमा बुझाएको जनाएको छ ।
कास्की प्रहरीले जबरजस्ती करणी मुद्दाका १६ जना, लागूऔषध मुद्दाका १६ जना, चोरी मुद्दाका २५ जना, कर्तव्य ज्यान मुद्दाका ८ जना, ज्यान मार्ने उद्योग मुद्दाका ९ जनालाई पक्राउ गरेर कारागारमा बुझाएको कास्कीका प्रहरी प्रवक्ता प्रहरी नायव उपरीक्षक (डिएसपी) हरिबहादुर बस्नेतले जानकारी दिए । उनका अनुसार अभद्र व्यवहार मुद्दाका ४ जना, सवारी अङ्गभङ्ग मुद्दाका १ जना, कुटपिटबाट अङ्गभङ्ग मुद्दाका– १ जना र मानव बेचविखन मुद्दाका १ जनालाई पनि पक्राउ गरेर कारागारामा बुझाइएको छ ।
बाँकी अन्यको पनि खोजी भइरहेको कास्की प्रहरीले जनाएको छ । जेनजी आन्दोलन भन्दा अगाडिसम्म कास्की कारागारमा ७ सय ७३ कैदीबन्दी तथा थुनुवाहरु थिए । जसमध्ये पुरुष ब्लकमा ७ सय ३८ जना र महिला ब्लकमा ३५ जना रहेको कारागार स्रोतले जनाएको छ । तीमध्ये हालसम्म ५ सय २१ कैदीबन्दी तथा थुनुवा कारागारमा आइसकेका छन् । बाँकी २ सय ५२ जना फरार रहेको र उनीहरुको खोजी भइरहेको कास्की प्रहरीले जनाएको छ ।
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
सन्देश श्रेष्ठपोखरा, कात्तिक ११ कास्कीको माछापुच्छ«े गाउँपालिकामा पाँच जना मिलेर साथीको हत्या…
