रुपन्देहीमा ३ दिन राखेर रविलाई फर्काइयो पोखरा

पोखरा, कात्तिक ३०

सहकारी ठगीको आरोपमा प्रहरी हिरासतमा रहेका राष्ट्रिय स्वतन्त्र पार्टी (रास्वपा) सभापती तथा पूर्व गृहमन्त्री रवि लामिछानेलाई पुनः कास्कीको पोखरा नै फर्काइएको छ । पोखराको सूर्य दर्शन बचत तथा ऋण सहकारीको रकम गोर्खा मिडिया नेटवर्क प्रालिमा लगेर अपचलन गरेको आरोपमा उनलाई गत कात्तिक २ गते काठमाडौंबाट पक्राउ गरेर पोखरा ल्याइएको थियो । पोखरामा अनुसन्धान भइरहँदा रुपन्देहीको सुप्रिम बचत तथा ऋण सहकारीको रकमसमेत सोहि मिडियामा लगेर अपचलन गरेको भन्दै उनीबिरुद्ध पक्राउ पुर्जी जारी भएपछि उनलाई कात्तिक २६ गते रुपन्देही लगिएको थियो । उनलाई त्यहाँ ३ दिन राखेर शुक्रबार अपराह्न पुनः पोखरा फर्काइएको हो ।

रुपन्देहीमा रहँदा उनलाई साढे २३ घण्टा बयान लिइएको थियो । त्यस क्रममा ७४ वटा प्रश्न सोधिएको र सो प्रश्नको जवाफ दिएको रुपन्देही प्रहरीले जनाएको छ । जसमा रविले ईन्कारी बयान दिएकोपनि प्रहरी श्रोतले बताएको छ ।

रुपन्देहीबाट दिउँसो १ः३० बजेको फ्लाईटबाट पोखरा अन्र्तराष्ट्रिय विमानस्थलमा अवतरण गराइएका उनलाई कडा सुरक्षा दिएर पोखरा–४ गैह्रापाटनस्थित जिल्ला प्रहरी कार्यालय कास्की लगिएको थियो । रविलाई पोखरा फर्काइने तयारी भएपछि विहानैदेखि पोखराको सुरक्षा व्यवस्था कडा बनाइएको थियो । तर जति नै सुरक्षा व्यवस्था कडा बनाइएपनि रविलाई जिप्रका लैजाने क्रममा रास्वपा र रविका समर्थकले निशेधित क्षेत्रमै प्रदर्शन गरेरै छाडे । रविलाई निशेधित क्षेत्र घोषणा गरिएको जिप्रका कास्कीको कार्यालय अगाडि पु¥याईंदा प्रदर्शन भएपछि प्रहरीलाई ७ जना प्रदर्शनकारीलाई पक्राउ गरेको छ । पक्राउ परेका अधिकांश पार्टीका कार्यकर्ता भएपनि केहि शुभचिन्तकपनि मात्र रहेको बताइएको छ ।

कास्की प्रहरीले निशेधित क्षेत्रमा प्रदर्शन गरेकाले पक्राउ गरिएको जनाइएको छ । कास्की प्रशासनले रविलाई पोखरा ल्याएलगत्तैदेखि जिप्रका रहेको गैह्रापाटनको पालिखेचोकदेखि पोखरा–४ को वडा कार्यालयसम्म तथा कास्की जिल्ला अदालत रहेको वाईचोक, राष्ट्रबैंकचोक, लेकसाईडको अम्बोट र मालपोत कार्यालयसम्मको क्षेत्रलाई निशेधित क्षेत्र घोषणा गरेको छ । निशेधित क्षेत्र भनेपनि सो क्षेत्रमा निर्वाध आवतजावत गर्न दिईदै आएको छ तर रविलाई अदालत लैजाने र ल्याउने समयमा भने कडाई गर्ने गरिएको छ । त्यसबाहेकको समयमा प्रहरीपनि तैनाथी अवस्थामा नहुँदा निशेधित क्षेत्र हटेको हो कि कायम छ भन्नेमा सर्वसाधारण अलमलमा पर्ने गरेका छन् ।

पूर्व गृहमन्त्रीसमेत रहेका रास्वपा सभापती लामिछानेमाथि पोखराको सूर्यदर्शन सहकारीको १ करोड उनकै नाममा लगेर पछि गोर्खा मिडियामा गाभेको तथा थप ५ करोड जिवी राईसँग मिलेर गोर्खा मिडियामा लगेर अपचलन गरेको आरोप छ । त्यस्तै बुटवलमा भने सुप्रिम सहकारीको १ करोड ९६ लाख आफ्नै नाममा लगेर सोहि मिडियामा गाभ्नुका साथै थप १४ करोड २९ लाखपनि लगेर अपचलन गरेको आरोप छ । यी दुबै सहकारीका बचतकर्ताले कास्की र रुपन्देहीमा लामिछानेसहित गोर्खा मिडियाका सञ्चालकहरु जिवी राई, छविलाल जोशीलगायतबिरुद्ध जाहेरी दिएका छन् । उनीहरुलाई संसदको सहकारी छानविन समितिले सहकारीको रकम अपचलनमा संलग्नता देखिएको भन्दै कारवाहीका लागि सिफारिस गरेको छ ।

छानविन समितिको सिफारिसका आधारमा प्रहरीले लामिछानेसहितका गोर्खा मिडियाका सञ्चालकहरुबिरुद्ध सहकारी ठगीसँगै संगठित अपराध र सम्पती शुद्धिकरसम्बन्धि मुद्धामा अनुसन्धान जारी राखेको छ । उनलाई कात्तिक २५ गते अदालतमा उपस्थित गराएर १३ दिनको म्यादसमेत थप गरिएको छ ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।