ईस्लामिक कंकोरस बन्यो क्लासिक सुईट्स टि–२० वुमन्स सुपर कपको च्याम्पीयन

पोखरा, बैशाख १०

क्लासिक सुईट्स टि–२० वुमन्स सुपर कप क्रिकेट प्रतियोगितामा ईस्लामिया कंकोरस च्याम्पीयन बनेको छ । पोखरा महानगरपालिका क्रिकेट संघले आयोजना गरेको प्रतियोगिताको उपाधि ईस्लामिया कंकोरसले जितेको हो । समान खेल जितेर अंक बराबर भएपनि नेट रनरेटमा अन्य दुई टिमलाई पछि पार्दै ईस्लामिया कंकोरस च्याम्पीयन बन्न सफल भएको आयोजक पोखरा महानगरपालिका क्रिकेट संघका अध्यक्ष बिरेन्द्र पुनले जानकारी दिए । च्याम्पीयन बनेको ईस्लामियाको प्लस २.४३ रनरेट थियो भने उपबिजेता बनेको पोखरा फोनिक्सको प्लस ०.१४ र अन्तिम बनेको फिस्टेल अप्मस्टको माइनस २.४३ रनरेट रहेको उनले बताए ।

अन्तर विद्यालय पोखरा महानगरपालिका स्तरीय टि–२० क्रिकेट प्रतियोगिताबाट छनौट भएका ३६ जनालाई तीन टिम बनाएर गरिएको प्रतियोगितामा च्याम्पीयन बनेको ईस्लामियासँगै फिस्टेल अप्मस्ट र पोखरा फिनिक्सले समान एक÷एक खेल जितेका थिए ।

च्याम्पीयन बनेको ईस्लामिया कंकोरस र उपबिजेता बनेको पोखरा फिनिक्सलाई ट्रफी प्रदान गरिएको छ ।

च्याम्पीयन बनेको ईस्लामिया कंकोरसले पहिलो खेलमा फिस्टेल अप्मस्टलाई ७३ रनको फराकिलो अन्तरले हराएको थियो । तर दोस्रो खेलमा भने ईस्लामिया पोखरा फिनिक्ससँग २ विकेटले पराजित भएको थियो । बुधबार भएको तेस्रो तथा अन्तिम खेलमा फिस्टेल अप्मष्टले पोखरा फिनिक्सलाई १५ रनले हराएपछि तीनवटै टिमको दुई÷दुई अंक भएको थियो । जसका कारण फराकिलो अन्तरले हराउने ईस्लामिया प्रतियोगिताको च्याम्पीन बन्न सफल भएको हो ।

लेखनाथस्थित ईडन हेभन क्रिकेट मैदानमा बुधबार भएको अन्तिम खेलमा फिस्टेल अप्मस्टले टस जितेर ब्याटिङ गर्दै २० ओभरमा ८ विकेट गुमाएर १२६ रन बनाएको थियो । जसमा चन्द्रमाया बरालले ३८ बलमा ४६ रन र सुविना गुरुङले ३१ बलमा १४ रनको योदान दिए । फिस्टेल अप्मस्टलाई दवाबमा राख्न पोखरा फिनिक्सकी स्मारिका चौधरीले ४ ओभरमा १४ रन खर्चेर २ विकेट तथा यसोदा भुजेलले ४ ओभरमा १८ रन खर्चेर २ विकेट लिएका थिए ।

१२७ रनको मध्यम लक्ष्य पछ्याएको पोखरा फिनिक्स १८.१ ओभरमा सबै विकेट गुमाएर १११ रनमा सिमितहुँदा दोस्रो खेल जित्ने सपना तुहिएको थियो । पोखरा फिनिक्सलाई सस्तैमा समेट्न फिस्टेल अप्मस्टकी पूर्णिमा गुरुङले ४ ओभरमा २१ खर्चेर ३ विकेट तथा कुसुम राईले ४ ओभरमा १९ रन खर्चेर २ विकेट हत्याएकी थिईन् । खेलमा प्लेयर अफ दी म्याच पूर्णिमा गुरुङ भएकी थिईन् ।

यसअघि दोस्रो खेलमा ईस्लामिया कंकोरसले पोखरा फिनिक्सलाईं २ विकेटले हराएको थियो । टस जितेर व्याटिङ गरेको ईस्लामियाले १५ ओभरमा सबै विकेट गुमाएर ८८ रन बनाएको थियो । जवाफी व्याटिङमा उत्रिएको पोखरा फिनिक्सले १७.४ ओभरमा ८ विकेट गुमाउँदै लक्ष्य भेट्टाएको हो ।

त्यस्तै, पहिलो खेलमा ईस्लामिया कंकोरसले फिस्टेल अप्मस्टलाई ७३ रनले पराजित गरेको थियो । टस जितेर फिस्टेल अप्मस्टले फिल्डिङ रोजेपछि पहिलो व्याटिङमा उत्रिएको ईस्लामिया कंकोरसले निर्धारित २० ओभरमा ७ विकेट गुमाएर १५३ रन बनाएको थियो । १५४ रनको लक्ष्य पछ्याएको फिस्टेल अप्मस्ट भने १० ओभरमा ९ विकेट गुमाएर केवल ७४ रनमा पुग्दा उज्यालोको समस्याले व्याटिङ गर्न असमर्थ भएपछि डिएलएस मेथर्ड अनुसार ईस्लामिया कंकोरसलाई ७३ रनले बिजयी भएको घोषणा गरिएको अध्यक्ष पुनले बताए ।

प्रतियोगिताबाट १४ जना खेलाडी छनौट गरिने पोखरा महानगरपालिका क्रिकेट संघले जनाएको छ । छनौट भएका खेलाडीहरुबाट पोखरा महानगरपालिकाको टिम निर्माण गरेर राष्ट्रिय स्तरको महानगर कप प्रतियोगिता खेल्ने संघका सचिव कपिलदेव गौतमले जानकारी दिए ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।