समाजसेवी थापाद्वारा सिद्ध मा.वि.लाई पच्चीस हजार पाँच सय सहयोग

पोखरा १५ गलेश्वर चोक निवासी समाजसेवी तथा कालिका मा. वि. रामबजारका पूर्व प्रधानाध्यापक प्रेमबहादुर थापाले पितृ उद्वारको कामना गर्दै सिद्ध मा.वि.को अक्षयकोषमा रु २५,५००/ सहयोग गरेका छन्

पितृ उद्धार तथा घरपरिवारका छोरा, बुहारी, नातिनातिनीहरु सबैको प्रगति र विद्यार्थीको उज्ज्वल भविष्य कोर्नमा सहयोगी बन्न पाउँदा आफूलाई खुसी लागेको शिक्षासेवी थापाले बताए ।

विद्यालय व्यवस्थापन समितिका अध्यक्ष प्रकाश पौडेलले शिक्षा जस्तो पवित्र क्षेत्रमा दान गर्नु भएकोमा धन्यवाद र आभार व्यक्त गर्दै उहाँको सम्पूर्ण थापा परिवारको सुस्वास्थ्य, सुखद् जीवन र उत्तरोत्तर प्रगतिको कामना गरे ।उनले विभिन्न व्यक्तिद्वारा प्रदान गरिएको अक्षयकोषको रकमको मूल धन खर्च नहुने र ब्याजबाट आउने रकम समग्र शैक्षिक उन्नयनमा खर्च गरिने बताउँदै “सिद्ध मा.वि.अक्षयकोष निर्देशिका -२०७५ अभियान” मा सहभागी हुन सम्पूर्णलाई आह्वान गरेका छन् । त्यस्तै पौडेलले अक्षयकोष कुनै सामाजिक संस्थाको नामबाट, आफ्नो नाम एवम् परिवारको नाममा राख्न सकिने व्यवस्था पनि मिलाइएको बताए।

पोखरा महानगरपालिका वडा न : १५ को एक मात्र सामुदायिक विद्यालय सिद्ध माविमा गरिब, विपन्न परिवारका बालबालिका पढ्न आउँछन् । उनीहरुको शैक्षिक सुधार र विद्यालयको समग्र शैक्षिक विकास, परिवर्तनका लागि बालबालिकाहरुलाई छात्रवृत्ति ,शैक्षिक सामग्री वितरण गर्ने गरि विद्यालयमा अक्षयकोष कार्यक्रम सञ्चालन गरिएको प्रधानाध्यापक गुरुदत्त कोइरालाले बताए ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।