सन्देश श्रेष्ठ
पोखरा, भदौ ११
पोखरामा यहि भदौ २० गते शनिबार तायाःमचा नृत्य प्रतियोगिता तथा गाईजात्रा महोत्सव आयोजना हुने भएको छ । नेवाःखल कास्कीको आह्वान तथा लामाचौर नेवाः खल गुठी कास्कीको आयोजनामा तायाःमचा नृत्य प्रतियोगिता तथा गाईजात्रा महोत्सवको २७ औं श्रृंखला पोखरा–१६ लामाचौर चोकमा हुन लागेको विहीबार पोखरामा पत्रकार सम्मेलन गरेर जानकारी दिइएको हो ।
तायाःमचा नाचको संरक्षण, सम्वद्र्धन र प्रवद्र्धनका लागि भन्दै हरेक वर्ष पोखरामा हुँदै आएको प्रतियोगिताको निरन्तरता स्वरुप यस वर्ष पनि प्रतियोगिता आयोजना गर्न लागेको आयोजक लामाचौर नेवाः खल गुठीले जनाएको छ । नेवारी समुदायमा परिवारको सदस्यको मृत्यू भएको एक वर्ष भित्र गाईजात्रा निकाल्ने परम्परा छ । गाईजात्रामा समावेश हुने बाजासहितको नाचलाई नै तायाःमचा भनिन्छ ।
गाईजात्रा यस वर्ष भदौ १३ गते शनिबार परेको छ । गाईजात्राको दिन घर÷घरबाट गाईजात्रासँगै तायाःमचा निकालेर बजार परिक्रमा गराउने चलन छ । त्यहि परम्परा र संस्कृतिको जगेर्ना गर्ने उद्देश्यले पोखरामा निरन्तर तायाःमचा नृत्य प्रतियोगिता आयोजना गर्ने गरिएको छ । तर गाईजात्राका दिन बजार परिक्रमा गर्दागर्दै रात पर्ने भएकाले गाईजात्रा पछिको पहिलो शनिबार तायाःमचा नृत्य प्रतियोगिता आयोजना गर्ने गरिएको नेवाःखल कास्कीका अध्यक्ष अशोक पालिखेले जानकारी दिए । ‘सबैको सजिलोका लागि गाईजात्रा पछिको पहिलो शनिबार तायाःमचा नृत्य प्रतियोगिता राखिएको हो’–उनले भने ।
विगत २७ वर्षदेखि आयोजना हुँदै आएको तायाःमचा नृत्य प्रतियोगिता पहिलो पटक लामाचौरमा हुन लागेको हो । यसअघि पोखराको भैरबटोल, विन्ध्यबासिनी, तेर्सापट्टी, रानीपौवा, पृथ्वीचोक, रामबजार, लेखनाथ लगायतका क्षेत्रमा भइसकेको छ । पहिलो पटक लामाचौरले तायाःमचा नृत्य प्रतियोगिता आयोजना गर्न पाएकाले यसलाई ऐतिहासिक बनाउने प्रयासमा आफूहरु लागेको प्रतियोगिताका मूल आयोजक समितिका संयोजक सुशीलकुमार श्रेष्ठले जानकारी दिए । उनले भने,‘यो हाम्रो संस्कृति हो, यसको संरक्षण, प्रवद्र्धन र सम्वद्र्धन गर्दै नया पुस्तालाई आकर्षित गरेर तायाःमचा संस्कृति पुस्तान्तरण गर्ने पनि उद्धेश्य हो ।’
प्रतियोगितामा यस वर्ष ३८ वटा टीम सहभागी हुने आयोजकको अनुमान छ । जसमा महिला १२ टिम सहभागी हुने लामाचौर नेवा ः खल गुठीका सचिव योगेन्द्र श्रेष्ठ (युगीन)ले जानकारी दिए ।
पत्रकार सम्मेलनमा बोल्दै नेवाः खल कास्कीका अध्यक्ष अशोक पालिखेले यस वर्ष अप्रतियोगीसहित ४० टिम सहभागी हुने बताए । ३८ टिम त प्रतिष्पर्धाका लागि नै उत्रिदैछन्,उनले भने,‘बाटुलेचौर र छोरेपाटनले पहिलो पटक सहभागिता जनाउँदैछन्, लामाचौरले आयोजक भएकाले अप्रतियोगीका रुपमा प्रस्तुती दिनेछ ।’ उनका अनुसार कास्कीमा नेवाःखलका ४८ वटा कचाः खल (शाखा) छन् । बाँकी ८ कचाःखलमा पातलो बस्ती र बसाईंसराईका कारण ती ठाउँहरुमा तायाःमचा नाच निकाल्न सकिएको छैन ।
नेवार समुदाय भएका हरेक टोलमा तायाःमचा निस्कियोस् भनेर आफूहरुले प्रतियोगिता गर्नेगरेको उनले बताए । ‘यसले तायाःमचा संस्कृति जीवन्त राख्न मद्धत पुग्छ भन्ने हाम्रो विश्वास हो’–उनले भने । उनले पर्यटकको बसाई लम्ब्याउनपनि तायाःमचा नृत्य प्रतियोगिताले सघाउने उनको दाबी छ ।
यस वर्षको प्रतियोगिताको बिजेताले १ लाख ११ हजार १ सय ११, द्वितीय हुनेले ७७ हजार ७ सय ७७ रुपैयाँ र तृतीय हुनेले ५५ हजार ५ सय ५५ रुपैयाँ तथा सान्त्वना हुने एक टीमले २५ हजार ५ सय ५५ रुपैयाँ प्राप्त गर्ने आयोजक लामाचौर कचाःखल गुठीका अध्यक्ष भीमबहादुर श्रेष्ठले जानकारी दिए ।
यस वर्ष महिलातर्फको उपाधि बिजेतालाई ४० हजार, द्वितीय हुनेलाई ३० हजार, तृतीय हुनेलाई २५ हजार र सान्त्वना स्थान प्राप्त गर्नेलाई २० हजार प्रदान गरिने जनाइएको छ । प्रतियोगितामा सहभागी प्रत्येक टिमलाई १५ हजार प्रोत्साहन स्वरुप प्रदान गरिने अध्यक्ष श्रेष्ठले बताए । प्रतियोगितामा पुरस्कारको लागि आवश्यक सम्पूर्ण रकम नगद १० लाख पोखरा–३ तेर्सापट्टी निवासी रामकाजी श्रेष्ठ, रविन्द्र श्रेष्ठ, शंकर श्रृष्ठ र कविन्द्र श्रेष्ठको परिवारले आफ्ना स्वर्गिय माता पीता हेमप्रसाद श्रेष्ठ र बालकुमारी श्रेष्ठको स्मृतिमा प्रदान गर्ने भएका छन् । अन्य रकम भने प्रायोजक तथा सहयोगीबाट संकलन गरिने लामाचौर कचाःखल गुठीका अध्यक्ष भीमबहादुर श्रेष्ठले जानकारी दिए ।
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
सन्देश श्रेष्ठपोखरा, भदौ ११ पोखरामा यहि भदौ २० गते शनिबार तायाःमचा नृत्य…
