पोखरा, साउन १२
गण्डकी प्रदेशका मुख्यमन्त्री सुरेन्द्रराज पाण्डे एक हप्ते चीव्वत भ्रमण सकेर स्वदेश फर्किएका छन् । नेपाल चीन कुटनीतिक सम्बन्ध स्थापना भएको ७० औं वर्ष प्रवेशको अवसरमा चीनको स्वशासित प्रान्त तिब्बत सरकारद्वारा आयोजित कार्यक्रममा सहभागी हुन गएका मुख्यमन्त्री सोमबार पोखरा फर्किएका हुन् ।
भ्रमणका क्रममा मुख्यमन्त्री पाण्डेले तिब्बत स्वायत्त क्षेत्रका लागि सिपिसीका महासचिव वाङ झुङजनसँग भेटवार्ता गरेका थिए । भेटका क्रममा मुख्यमन्त्री पाण्डेले तिव्वतसँग जोडिएको कोरला नाका नियमित सञ्चालन गर्नका लागि सहकार्यको प्रस्ताव गरेको मुख्यमन्त्री पाण्डेको सचिवालयले जनाएको छ । सचिवालयले जारी गरेको विज्ञप्तीमा भनिएको छ,‘भेटमा मुख्यमन्त्री पाण्डेले दुई देशबिचको व्यापार, पर्यटन प्रवद्र्दनका लागि सहकार्यको प्रस्ताव गर्नुभयो ।’
सो अवसरमा मुख्यमन्त्री पाण्डेले तिब्बतको नाका भएर मानसरोवर जाने नेपाली र विदेशी यात्रीहरुको यात्रा सहजीकरण गर्ने, चीनका शहरहरुबाट काठमाडौँ र पोखरा दुबैतर्फ सीधा उडान थप गर्ने, तिब्बत र गण्डकी प्रदेशबिच लगानी र पर्यटन प्रर्वद्धनका क्षेत्रमा सम्बन्ध कायम राख्दै विस्तार गर्ने, नेपाल र चीनियाँ ठूला लगानीकर्ता आकर्षित गर्न कर छुटमा सहजिकरण गर्ने, पोखराबाट ल्हासा आउने पर्यटकको भिषा र प्रवेश पास उपलब्धतामा सहजीकरण र सहकार्य गर्ने गराउने विषयमा छलफल भएको मुख्यमन्त्री पाण्डेका प्रेस संयोजक नरहरी आचार्यले जानकारी दिए ।
भेटमा मुख्यमन्त्री पाण्डेले विभिन्न समयमा चीन सरकारले अनुदान र सहयोग गरेको र सो कारण पूर्वाधार निर्माणसँगै पर्यटन प्रवद्र्दनमासमेत टेवा पुगेको बतए । यसले तिव्वत र गण्डकी प्रदेश सरकारबीचको सम्बन्धमा थप सुदृढ हुने उनले आशा व्यक्त गरे ।
सो अवसरमा सिपिसीका महासचिव वाङ झुङजनले कोरला नाका व्यवस्थित गर्नसके दुई सरकारबीच सहकार्यको अवसर बन्नसक्ने बताए । यसका लागि तिव्वत सरकार सकारात्मक रहेको झुङजनले बताए भनि मुख्यमन्त्रीलाई उद्धृत गर्दै उनको सचिवालयले जनाएको छ । उनका अनुसार अन्य धेरै कार्यमा सहकार्य र सहयोग गर्न तिव्वत सरकार तयार रहेकोपनि पाण्डेको भनाई छ ।
तिव्वत भ्रमणका क्रममा सिपिसीका लिञ्जी नगर समितिका पार्टी सचिव आओ लिउक्वान र सो नगरका मेयर बाटासँग पनि मुख्यमन्त्री पाण्डेले भेटवार्ता गरेका थिए । सो अवसरमा मुख्यमन्त्री पाण्डेले नेपालको पर्यटन राजधानी पोखरासँग लिन्जी शहरले गर्दै आएको सहयोग र सहकार्यको प्रशंसा गरेका थिए । भेटमा दुई शहरबीच पर्यटन, खेलकुद, व्यापार लगायतका क्षेत्रमा सहकार्य गर्ने विषयमा द्विपक्षीय छलफल भएको मुख्यमन्त्री पाण्डेले बताएका छन् ।
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
पोखरा । फिस्टेल हस्पिटल, पोखरा र दक्षिण कोरियाको प्रसिद्ध मार्पे कम्पनीबीच आपसी…
