कास्कीको मादी गाउँपालिकामा १५ शैय्याको अस्पताल शिलान्यास

सरकारले गुणस्तरीय आधारभूत स्वास्थ्य सेवामा नागरिकको पहुँच सुनिश्चित अभियान अन्तर्गत कास्कीको मादी गाउँपालिकामा आज १५ शैय्याको अस्पताल भवनको शिलान्यास गरिएको छ ।
गाउँपालिका वडा नं. ७ को तल्लो छाचोक(खन्टारी)मा १० रोपनी क्षेत्रफल जमिनमा निर्माण गरिने अस्पतालको प्रतिनिधिसभाका सांसद एवम् पूर्व स्वास्थ्य तथा जनसङ्ख्यामन्त्री खगराज अधिकारीले शिलान्यास गर्नुभयो ।
कोरोना भाइरसको महामारीपछि सरकारले स्वास्थ्य क्षेत्रलाई प्राथमिकतामा राखेर देशभरका अस्पतालमा स्वास्थ्य उपकरण तथा क्षमता वृद्धिका साथै नयाँ संरचना निर्माण शुरु गरेको जानकारी दिनुभयो ।
गाउँपालिका रहेको थुम्सीकोट प्राथमिक स्वास्थ्य केन्द्रबाट हाल प्रवाह भइरहेको सेवाबाट उत्तरी भेगका जनतालाई पायक नपर्ने र सामान्य बिरामी पर्दा समेत पोखरा जानुपर्ने बाध्यता अस्पताल बनेपछि हट्ने विश्वास लिइएको छ ।
गण्डकी प्रदेशसभा सदस्य मनबहादुर गुरुङले सङ्घ,प्रदेश र स्थानीय सरकारसँगको समन्वयमा अस्पताल निर्माणपछि गुणस्तरीय सेवा प्रवाहका लागि आफू लागि पर्ने प्रतिवद्धता व्यक्त गर्दै विकासमा पछि परेको मादीमा विजयपुर र ज्याउदुमा पक्की मोटरेवल पुल निर्माणपछि सहज भएको बताउनुभयो ।
जिल्ला समन्वय समितिका प्रमुख बैनबहादुर अधिकारी क्षेत्रीले विगतमा चार÷पाँच वर्षमा एउटा पुलको योजना गाउँपालिकामा पर्दा समेत गौरव गर्नुपर्ने क्षण रहेको स्मरण गर्दै मादी गाउँपालिकामा मंसीर महिनामा तीन वटा मोटरेवल पुलको शिलान्यास तथा एउटा मोटरेवल र झोलुङ्गे पुलको उद्घाटन गरिएको उल्लेख गर्नुभयो ।
नेपाल सरकारको देशका ३९६ स्थानीय तहमा अस्पताल बनाउने योजना अनुसार जिल्लाको उत्तर पूर्वमा अवस्थित भौगोलिक रुपमा विकट मादीमा अस्पताल बनाउने प्रक्रिया अघि बढाइएको गाउँपालिका अध्यक्ष बेदबहादुर गुरुङ(श्याम)ले बताउनुभयो ।
उहाँका अनुसार अस्पताल बनेसँगै मादीको उत्तरी भेगका वडा नं १,२,३,४,५,६ र ७ नं वडाका नागरिक प्रत्यक्ष लाभान्वित हुने विश्वास लिइएको छ । अस्पतालको विस्तृत आयोजना प्रतिवेदन(डिपिआर), डिजाइन तथा बोलपत्र आह्वान लगायतका काम छिट्टै अघि बढाईने तयारी भईरहेको छ ।
अस्पताल निर्माणका लागि स्वास्थ्य तथा जनसङ्ख्या मन्त्रालयबाट रु तीन करोड २३ लाख बजेटको अख्तियारी गाउँपालिकालाई आइसकेको बताइन्छ । बहुवर्षीय योजना अन्तर्गत निर्माण हुने सो अस्पपतालका लागि रु १८ करोड ३२ लाख बजेट तय गरिएको गाउँपालिका अध्यक्ष गुरुङले जानकारी दिनुभयो ।
कार्यक्रममा स्थानीय राजनीतिक दलका प्रतिनिधि तथा सङ्घ संस्थाका प्रतिनिधिले अस्पताल बनाउने काममा गाउँपालिकालाई आवश्यक सहयोगको प्रतिवद्धता व्यक्त गरेका थिए ।
कार्यक्रममा अस्पतालका लागि जमिन उपलव्ध गराउने जग्गादाता तथा ज्याउदु पुल निर्माणका जग्गादाताहरुलाई दोसल्लाबाट सम्मान गरिएको गाउँपालिकाका प्रमुख प्रशासकीय अधिकृत नारायण सापकोटाले जानकारी दिनुभयो ।
त्यसैगरि सोही कार्यक्रम अन्तर्गत आजै कास्कीको रुपा गाउँपालिका र अन्नपूर्ण गाउँपालिकामा पनि १५। १५ श्ययाको आधारभूति अस्पतालको शिलान्यास गरिएको छ भने माछापुच्छ्रे तथा पोखरा महानगरपालिकामा निकट भविष्यमै अस्पतालको निर्माण प्रकृयालाई अघि बढाइने जनाइएको छ
सरकारले ३९६ स्थानीय तहमा पाँच देखि १५ श्ययाको गणुस्तरीय आधारभूत अस्पताल र मुलुकका सात वटा प्रदेशमा १। १ संक्रामक रोग उपचार अस्पताल निर्माण गरि सञ्चालन गर्ने अभियान आजै बाट शुरु गरेको हो ।
हरि बास्तोला÷कृष्ण दवाडी

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।