तनहुँको व्यास नगरद्वारा भूकम्पपीडितलाई पाँच लाख सहयोग गर्ने

कार्तिक २२ तनहुँ । व्यास नगरपालिकाले जाजरकोट भूकम्पपीडितका लागि रु पाँच लाख सहयोग गर्ने निर्णय गरेको छ ।

व्यास नगरप्रमुख वैकुण्ठ न्यौपानेको अध्यक्षतामा बुधबार बसेको बैठकले उक्त निर्णय गरेको हो । भूकम्प पीडितको राहत सहयोगका लागि नगरपालिकाको विपद् कोषबाट उक्त रकम उपलब्ध गराउने निर्णय गरेको प्रमुख प्रशासकीय अधिकृत गङ्गालाल सुवेदीले जानकारी दिए ।

भूकम्पमा परी ज्यान गुमाउनेप्रति श्रद्धासुमन व्यक्त गर्दै घाइतेको शीघ्र स्वास्थ्यलाभको कामना गरेको छ । साथै यस नगरपालिकाभित्र पनि भूकम्पको धक्काका कारण केही घर भत्किन गएको सूचना प्राप्त भएकाले नगरवासीलाई सुरक्षित रहन, कुनै विपद्जन्य अवस्था आइपरेमा नगरपालिकालाई सूचित गर्न अनुरोध गर्ने निर्णय गरेको छ ।

बैठकले व्यास नगरपालिकाअन्तर्गत जग्गा वर्गीकरण एवं सडक मापदण्ड निर्धारण कार्यविधि, २०८० पारित गरेको प्रमुख प्रशासकीय अधिकृत सुवेदीले बताए । व्यास नगरपालिका दलित समन्वय समितिसम्बन्धी कार्यविधि, २०८० र नगरपालिकाबाट सम्पादित कार्यको विवरण तयारी निर्देशिका, २०८० पारित गरेको छ ।

व्यास नगरपालिका मानसिक स्वास्थ्य सम्बन्धी नीति पारित गर्ने र व्यास नगरपालिका वैदेशिक रोजगार व्यवस्थापनसम्बन्धी कार्यविधि, २०७८ लाई संशोधन गर्ने निर्णय गरेको छ । नगरपालिकाभित्रका सञ्चालित खानेपानीका केही मूल दर्ता भएको नदेखिँदा तीन महिनाभित्र मूल दर्ताका लागि सूचना दिन निर्णय गरेको छ । रासस

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।