पोखराको पातले छाँगो ठेक्का सम्झौताबिरुद्द आन्दोलित स्थानियलाई खुकुरी प्रहार गर्न खोज्ने एक पक्राउ

सन्देश श्रेष्ठ
पोखरा, भदौ १९

पोखराको पर्यटकीय गन्तव्य पातलेछाँगो (डेभिडफल्स) ठेक्का लगाउने विवादले उग्र रुप लिदै गएको छ । पोखरा महानगरपालिकाले छोरेपाटन माविबाट स्वामित्व खोसेर ४० वर्षका लागि डेभिडफल्स सेती क्यानोनिङलाई दिइएपछि स्थानियले विरोध गर्दै आएका छन् । महानगर र सेती क्यानोईङ कुनै पनि हालतमा ठेक्का सम्झौता अनुसार अघि बढ्ने र स्थानिय कुनै पनि हालतमा काम गर्न नदिने अडानमा रहेपछि दुई पक्षबीच भएको विवादले उग्र रुप लिदै गएको हो ।

विहीबार पनि यी दुई पक्षबीच झडपको स्थिति उत्पन्न भएको छ । डेभिडफल्सको ठेक्का पाएको सेती क्यानोनिङले विहीबार सार्वजनिक सुनुवाई राखेको थियो । सार्वजनिक सुनुवाईका प्रमुख अतिथि थिए पोखरा महानगरपालिकाका प्रमुख (मेयर) धनराज आचार्य । तर स्थानियले विद्यालयको स्वामित्वमा रहेको डेभिडफल्सलाई ४० वर्ष लामो ठेक्कामा लगाउन नपाईने भन्दै विरोध जारी राख्यो । विरोधकाबीच कार्यक्रम अघि बढाउन खोज्दा केहिबेर तनावसमेत उत्पन्न भएको थियो । कार्यक्रम स्थल तनावग्रस्त बनेपछि मेयर आचार्य कार्यक्रममा आफ्नो भनाई नराखी कार्यक्रम स्थल छाडेर बाहिरिएका थिए ।

त्यहि बिचमा स्थानिय र विद्यार्थीहरुले नाराबाजीसहित प्रदर्शन जारी राखे । त्यहिबेला विद्यार्थी नेताहरुमाथि खुकुरी प्रहार गर्ने योजना बनाईरहेको स्थानियले सुईंको पाए । कार्यक्रम स्थल नजिकै बसेर आक्रमण गर्ने योजना बनाईरहेका ५ जनालाई स्थानियले घेरा हालेर नियन्त्रणमा लिने प्रयास गर्दा दुई पक्षबीच केहिबेर हानाहान भएको थियो । सो क्रममा आक्रमणकारी मध्येका एक पोखरा–९ न्यूरोडका वंशज सिंह खवासलाई स्थानियले नियन्त्रणमा लिएर प्रहरीलाई बुझाएको छ । स्थानियले नियन्त्रणमा लिने क्रममा आक्रमणकारी मध्येका एक सिंह घाईतेसमेत भएका थिए । उनलाई प्रहरी नियन्त्रणमा राखेर उपचार जारी राखिएको कास्की प्रहरीका सूचना अधिकारी प्रहरी नायव उपरीक्षक (डिएसपी) हरिबहादुर बस्नेतले जानकारी दिए । उनको साथबाट एक थान खुकुरीसमेत बरामद गरिएको उनले बताए । आक्रमण गर्ने अन्यको खोजी भइरहेको डिएसपी बस्नेतले बताए । ‘सबै आक्रमणकारीको खोजी भइरहेको छ, फरार भएकाले उनीहरुको पहिचान खुलाउन मिल्दैन’–उनले भने ।

पोखरा महानगरपालिकाले विद्यालय व्यवस्थापन समितिबाट खोसेर सेती क्यानोनिङ प्रालिलाई ४० वर्षका लागि ठेक्कामा दिएको छ । पातले छाँगो दृश्यावलोकनलाई व्यवस्थित बनाउने र शिसाको पुल बनाएर आम्दानीको श्रोत बढाउने भन्दै महानगरले ठेक्कामा लगाएको हो । तर स्थानिय त्यसको विरोधमा छन् ।

विरोधको नेतृत्वकर्ता मध्येका एक स्थानिय कांग्रेस नेता देवराज आचार्यले महानगरले नीजि कम्पनीसँग प्राकृतिक सम्पदाको दोहन गरिरहेकाले विरोध गर्नुपरेको बताए । ४० वर्ष लामो समय नीजि कम्पनीलाई डेभिडफल्स दिने निर्णय कुनै पनि हालतमा नमान्ने बताउँदै उनले भने,‘यो गलत हो । यो सम्झौता खारेज हुनुपर्छ । खारेज नभएसम्म हामी लडिरहन्छौं ।’

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।