सन्देश श्रेष्ठ
पोखरा, असोज २३
अखिल नेपाल राष्ट्रिय स्वतन्त्र विद्यार्थी युनियन अनेरास्ववियू (क्रान्तिकारी)ले पोखराको विन्दुवासिनी संस्कृत विद्यापीठ क्याम्पसमा आर्थिक अनियमितता भएको आरोप लगाएको छ । अखिल क्रान्तिकारी विन्दुवासिनी क्याम्पस शाखाले आर्थिक शाखा प्रमुख दुर्गारमण पराजुली अन्य केहि प्राध्यापकहरुले क्याम्पसको विद्यार्थी कल्याणकारी कोष र छात्रवृत्ति कोषको लाखौं रकम हिनामिना गरेको विहीबार विज्ञप्ती निकालेर जनाएको छ । आर्थिक शाखा प्रमुख पराजुलीले आन्तरिक लेखा परीक्षणलाई समेत प्रभावमा पारेर वर्षौंदेखि आर्थिक अनियमितता गर्दै आएको पूर्व क्याम्पस प्रमुखहरुले बताएको पनि विज्ञप्तीमा उल्लेख छ ।
अखिल क्रान्तिकारीले हालसम्मको कल्याणकारी कोष र नेपाल सरकारबाट प्राप्त छात्रवृत्ति कोषणको रकम अविलम्व सार्वजनिक गर्न माग गरेको छ । विज्ञप्तीमा भनिएको छ,‘अन्यथा भ्रष्ट आचारणकाबिरुद्द अखिल क्रान्तिकारी जुनसुकै कदम चाल्न बाध्य हुनेछ ।’ आन्दोलनबाट हुने क्षेतीको जिम्मा भने आर्थिक शाखा प्रमुखले लिनुपर्ने जनाएको छ ।
अखिल क्रान्तिकारीले क्याम्पस प्रशासनले अटेर गरेमा अख्तियार कार्यालय जाने पनि चेतावनी दिएको छ । साथै घटनाको ढाकछोप गर्न केहि प्राध्यापकहरु लागिपरेको भन्दै त्यसतर्फ पनि आफुहरुको गम्भीर ध्यानाकर्षण भएको जनाइएको छ ।
अखिल क्रान्तिकारीले विन्दुवासिनी संस्कृत विद्यापीठमा लामो समयदेखि शैक्षिक र प्रशासनिक क्षेत्रमा विकृति, विसंगती, स्वेच्छाचारी र मनोमानी चलेको प्रमाण आफूसँग भएको दाबी गरेको छ । क्याम्पसमा केहि प्राध्यापकहरु क्याम्पस प्रशासनमा दैनिक हाजिरी नभई कहिलेकाहिंमात्र आउने गरेको तर आएको दिन नआएको दिनको पनि हाजिर गरेर टाप कस्ने गरेको दाबी क्रान्तिकारीको छ । साथै हाजिर नगरी तलव भत्ता खाने गरेको पाइएको र यो विश्वविद्यालयको नियम विपरित रहेकाले यसलाई ठगी धन्दाको संज्ञा दिदै सच्याउन चेतावनी दिइएको छ ।
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
मनाङमा आइतबार गएको हिम पहिरोमा परेर मृत्यु हुनेको संख्या ४ पुगेको छ…
