रसुवाको भोटेकोशी नदीमा गएको अकल्पनीय विनाशकारी बाढीमा अकालमा ज्यान गुमाएकाहरूको सम्मानमा आज राष्ट्रिय शोक मनाइँदै छ ।
प्रधानमन्त्री तथा मन्त्रिपरिषद्को कार्यालय सिंहदरबारमा यही भदौ १८ गते बसेको मन्त्रिपरिषद् बैठकले भदौ १० गते भोटेकोशीमा आएको भीषण बाढीमा ज्यान गुमाएकाको सम्मानमा आज राष्ट्रिय शोक मनाउने निर्णय गरेको थियो । आज नेपालभरका सरकारी कार्यालय तथा विदेशस्थित नेपाली दूतावास र नियोगमा राष्ट्रिय झन्डा आधा झुकाइएको छ । यसैबिच विनाशकारी बाढीमा परेर अकालमा ज्यान गुमाएकाहरुको सम्मानमा पोखरामा स्वस्ति शान्तीसहित दीप प्रज्वलन गरिएको छ । पोखरामा पहिचान नखुलेका ७६ वटा शव व्यवस्थापन गरिएको स्थल पोखरा १६, जौवारीस्थित गारतारो क्षेत्रको शिशौंघारीमा वटुकहरुको स्वस्ति शान्ती वाचन गरि १०८ दीप प्रज्वलन गरिएको हो । त्यस अवसरमा शोक सभा समेत गरिएको थियो ।
सभामा पोखरा महानगरपालिकाका प्रमुख धनराज आचार्य, पोखरा १६ का वडाध्यक्ष अमृत शर्मा तिमिल्सीना, पोखरा १ का वडाध्यक्ष सहारा प्रधानलगायतका जनप्रतिनिधी, प्रशासनका प्रमुखहरु, सुरक्षा निकाय र स्थानीयबासीको उपस्थिती रहेको थियो । सहभागीहरुले दीप प्रज्वलन गर्नुका साथै शव व्यवस्थापन गरिएको क्षेत्रमा पुष्प अर्पण गरेका थिए । त्यस्तै वडा कार्यालय पोखरा १६, भुतपुर्व विन्ध्यवासिनी विद्यार्थी मञ्च, नव आदर्श सामुदायिक विकास समाज, मैदान आमा समुह लगायतका त्यस क्षेत्रका संघ संस्थाले आज साँझ मैदान चोक र लामाचौर चोकमा दीप प्रज्वलन गर्ने तयारी गरेका छन् ।
प्रहरी प्रधान कार्यालय नक्सालले आइतबार साँझसम्म जनाए अनुसार भोटेकोशी बाढीमा परी मृत्यु भएकामध्ये हालसम्म एक हजार ३४२ जनाको शव फेलापरेको छ । यस्तै, बाढीमा परी अझै तीन हजार ९९२ जना सम्पर्कविहीन छन् ।
सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।
पोखरा १८ मा रहेको सुनगाभा बचत तथा ऋण सहकारी संस्थाले ७ करोड…
