क्षेतीको निरीक्षण गर्दै मुख्यमन्त्री पाण्डेले भने : आन्दोलनलाई भड्काएर ध्वंश गर्नेलाई कारवाहीको दायरामा ल्याउनुपर्छ

सन्देश श्रेष्ठ
पोखरा, भदौ ३१

गण्डकी प्रदेशका मुख्यमन्त्री सुरेन्द्रराज पाण्डेले सरकारी कार्यालयमा पुगेको क्षेतीको निरीक्षण गरेका छन् । मुख्यमन्त्री पाण्डेले जेनजी आन्दोलनका क्रममा गत भदौ २४ गते सरकारी कार्यालयहरुमा भएको तोडफोड तथा आगजनीको मंगलबार निरीक्षण गरेका हुन् ।

जेनजी आन्दोलनका बेला मुख्यमन्त्री पाण्डे युएईमा थिए । कास्की समाज यूएईको कार्यक्रममा सहभागी हुन युएई गएका उनी सोमबार मात्र पोखरा फर्किएका हुन् । जेनजी आन्दोलनका क्रममा गण्डकी प्रदेश तनावग्रस्त भइरहँदा मुख्यमन्त्री पाण्डे भने विदेश सयरमा मस्त भएपछि उनको आलोचना भएको थियो । स्वदेश फर्किदा जोखिम हुने सन्देश पाएपछि उनले टिकट काटेर पनि फ्लाईट सारेको अहिले पोखरामा चर्चा छ ।

मुख्यमन्त्री पाण्डेले मंगलबार जेनजी आन्दोलनका क्रममा तोडफोड तथा आगजनी भएको मुख्यमन्त्री तथा मन्त्री परिषदको कार्यालय शुरुमा निरीक्षण गरेका थिए । त्यसपछि उनी पोखरा–३ नदीपुरस्थित गण्डकी प्रदेश सभासमेत पुगेर आगजनीको क्षेतीको अवलोकन गरेका थिए । आगलागीका कारण गण्डकी प्रदेश सभा खण्डहर बनेको छ भने मुख्यमन्त्री तथा मन्त्री परिषदको कार्यालयमा पनि ठूलो क्षेती पुगेको छ । आगलागीका कारण दुबै ठाउँका भवनसँगै दुईपांग्रे तथा चारपांग्रे सवारी साधन, कम्प्युटर, ल्यापटप, प्रिन्टर, क्यामेरा, टेलिभिजन, स्मार्टबोर्ड, कुर्सी, टेबल, दराज, सोफा लगायतका सामग्री जलेर नष्ट भएका छन् ।

मुख्यमन्त्री पाण्डेले मंगलबार नै जिल्ला प्रशासन कार्यालय कास्की, जिल्ला प्रहरी कार्यालय कास्की, अख्तियार दुरुपयोग अनुसन्धान आयोगको प्रदेश कार्यालय, मुख्यमन्त्री निवासलगायतका संरचनामा लागेको आगोको क्षेतीको पनि निरीक्षण गरेका थिए ।

क्षेतीको निरीक्षणपश्चात मुख्यमन्त्री पाण्डेले सरकारी कार्यालयहरुमा तोडफोड तथा आगजनी गर्नेलाई कानूनी कारवाही गर्नुपर्ने बताए । उनले भने,‘आन्दोलनलाई भड्काएर ध्वंस गर्नेलाई कानूनी दायरामा ल्याउनुपर्छ ।’ तर जेनजीका जायज मुद्दा र मागका विषयमा भने तीनै तहका सरकार गम्भीर हुनुपर्ने उनको भनाई छ । मुख्यमन्त्री पाण्डेले ध्वंस भएका संरचनाहरुको छिट्टै पुर्ननिर्माण गरिने बताए । त्यसका लागि सहयोग गर्न उनले आम जनतामा अपिलसमेत गरे । उनले ध्वंस संरचनाका बाबजुद प्रदेश मातहतका कार्यालयहरुलाई सेवा सञ्चालनका लागि निर्देशन दिइसकेको उनले जानकारीसमेत दिए । भौतिक संरचना पुर्ननिर्माणका विषयमा भने संघ सरकारले लिने नीति र प्रदेशलाई दिने बजेटका आधारमा थप योजना बनाएर अघि बढ्ने उनको भनाई छ ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।