नेवाः मिसा पुचले आयोजना गरेको झ्व भ्वय भव्य रुपमा सम्पन्न

सन्देश श्रेष्ठ
पोखरा, पुस १७

नेवाः मिसा पुच कास्कीले शनिबार आयोजना गरेको झ्व भ्वय भव्य रुपमा सम्पन्न भएको छ । नेवाः खल कास्कीको सहयोगमा मिसा पुचले नेवा छेँ भवन भीमसेनटोलमा आयोजना गरेको नेवारी सांस्कृतिक उत्सव झ्व भ्वयमा १ हजार ५ सय बढी सहभागी भए । जहाँ नेवार समुदायका युवा, युवतीदेखि बालबालिका र बृद्दबृद्दासम्मले झ्व भ्वय खाएका थिए भने गैरनेवार समुदायका पनि उत्तिकै सहभागी भए ।

झ्व भ्वय खान नेवार समुदायका पुरुषहरु दौरा सुरुवाल र महिलाहरु हाकुपटासीमा सजिएर आएका थिए । अझ पस्किएर दिनेसमेत नेवारी भेषभुषामा सजिएका थिए भने उनीहरुले नेवारी सभ्यता, संस्कार र संस्कृति अनुसार खानाहरु पस्किएका थिए । खानामा नेवारी परिकारहरु बनाइएको थियो । नेवार समुदायमा वासालाई सगुनको रुपमा दिएर पाहुनाको स्वागत गर्ने संस्कार झ्व भ्वयमा पनि पालना गरिएको थियो । शुरुमा वासासँगै चिउरासँग छोईलालगायतका सुख्खा परिकार, त्यसपछि ग्रेभी र झोलिलो पदार्थहुँदै अन्त्यमा डेजर्टका रुपमा चुसीफुसी खुवाएर बिदाई गरिएको नेवा मिसा पुच कास्कीकी अध्यक्ष संगीता बज्राचार्यले जानकारी दिईन् । यो हाम्रो सांस्कृतिक उत्सव हो,‘यसले संस्कार, संस्कृति संरक्षण, सम्वद्र्दन र प्रवद्र्दन गर्न महत्वपूर्ण भूमिका खेल्छ ।’

नेवाः खल कास्कीका अध्यक्ष अशोक पालिखेले मिसा पुचको अगुवाईमा भएको झ्व भ्वय कार्यक्रम खाना संस्कृतिसँगै सभ्यता, संस्कार र संस्कृति पुस्तान्तरण गर्न कोशेढुंगा सावित भएको बताए । उनले यसलाई आगामी दिनमा पनि निरन्तरता दिईने बताए ।

संस्कृतिकर्मी तीर्थ श्रेष्ठले खाना संस्कृति जमिन र जीवनसँग अनुन्याश्रित भई खाद्य संस्कृतिका रुपमा परम्परादेखि नै चल्दै आएको बताए । पश्चिमा संस्कृतिको अतिक्रमणको चपेटामा परिरहेको नेवारी संस्कृतिको जगेर्नामा यसले महत्वपूर्ण भूमिका खेल्ने उनको भनाई छ ।

नेवाःमिसा पुचःले संस्कार र संस्कृतिको संरक्षण तथा प्रवद्र्दनका लागि २०७२ सालदेखि हरेक ३÷३ वर्षमा यो कार्यक्रम गर्दै आएको छ । विश्वव्यापी महामारीका रुपमा फैलिएको नोभल कोरोना भाइरस कोभिड–१९ का कारण बिचमा रोकिए पनि ३ वर्षअघिदेखि यो पुनः सुरु भएको हो ।
कार्यक्रममा निसा देसार लगायतका कलाकारहरुले सांगीतिक तथा सांस्कृतिक कार्यक्रम पनि प्रस्तुत गरेको कार्यक्रम संयोजक तथा नेवा मिसा पुचःकी उपाध्यक्ष शान्ती प्रधानाङ्गले जानकारी दिईन् ।

भोज फिस्टेल आईभिएफ फर्टिलिटी सेन्टर गैह्रापाटनको मुख्य प्रायोजना र पोखरा महानगरपालिका वडा नम्बर–९ को विशेष सहयोगमा सम्पन्न भएको हो ।

सर्बाधिकार सुरक्षित गरिएको बारे : यस एभरेस्ट आवाज डटकमबाट सम्प्रेषित कुनैपनि समाचार, लेख, बिचार, टिप्पणी वा अन्य कुनैपनि किसिमको सामग्री सर्वाधिकार सुरक्षित गरिएको छ । यहाँ सम्प्रेषित कुनैपनि सामग्री बिना अनुमति साभार गरेको पाईए कानुनी कारबाहीमा जान बाध्य हुने जानकारी गराउँछौं ।